«Որդիս փակ երեխա էր». ՌԴ դեսպանին սպանողի մայրն ու հայրը խոսել են

Թուրքիայում իշխանամետ «Անադոլու» լրատվական գործակալության թղթակիցը հայտնել է, որ պարզ է՝ Թուրքիայում ՌԴ դեսպանին սպանողի ընտանիքը ձերբակալվելուց հետո ինչ ցուցմունքներ է տվել ոստիկանությունում:

Ըստ «Անադոլու» գործակալության՝ ընտանիքի անդամներին ուղղվել են հարցեր, թե վերջին անգամ ե՞րբ են հանդիպել Ալթընթաշի հետ, իրագործելիք սպանության մասին որևէ բան խոսե՞լ է, թե՞ ոչ, անդամակցո՞ւմ է ահաբեկչական որևէ խմբավորման, կապեր ունի՞ գյուլենականների հետ:

Հանցագործի մայրը՝ Համիդիե Ալթընթաշը, պատմել է, որ սպանության օրը որդին զանգահարել է իրեն այն ժամանակ, երբ ինքը հյուր է գնացել:

«Ասացի, որ հյուր եմ եկել, հետո կխոսենք: Ասաց` լավ, Աստված թող քեզ պահապան լինի, ասաց և հեռախոսն անջատեց: Իմ որդին անգամ ոստիկան դառնալու քննություններին պատրաստվել է միայնակ: Իմ երեխան եղել է փակ, լուռ ու հանգիստ»,- նշել է մայրը:

Հանցագործի հայրը՝ Էսրաֆիլ Ալթընթաշը, պատմել է, որ որդին թեև ոչ անգամ ամեն օր, սակայն երկու օրը մեկ զանգել է իրեն կամ մորը, անգամ սպանության օրը զանգահարել է իրեն ու տեղեկացրել, որ լիցքավորել է իր հեռախոսը:

«Նրան հարցրեցի՝ աշխատո՞ւմ ես: Ասաց, որ արձակուրդ է, շուկայում զբոսնում է և շուտով կգնա ճաշելու: Նրա խոսքում աննորմալ ոչինչ չնկատեցի: Իզմիրի «Ռուշթու Ունսալ» ոստիկանական բարձրագույն դպրոց ընդունվելուց հետո նա Սերջան Բ. անունով մի ուսանողի հետ մտերմացավ: Ընդունվելուց հետո ավելի փակ և լուռ էր դարձել: Սերջանի հետ այնքան մոտ էր, որ Իզմիրում սովորելու ընթացքում Անկարա տեղափոխվեց Սերջանի հետ, չնայած նրան, որ ես նրան առաջարկել էի Իզմիրում մնալ», -պատմել է Մերթի հայրը:

Հիշեցնենք, որ թուրքական իշխանությունները Մերթ Ալթընթաշին մեղադրում են Գյուլենական շարժման անդամ լինելու մեջ, որին նույնպես մեղադրում են ՌԴ դեսպանի սպանության հարցում կապեր ունենալու մեջ: