Արմեն Ամիրյանը չի փոշմանել

ՀՀ մշակույթի նախարար Արմեն Ամիրյանը Սերժ Սարգսյանի մասին շատ բարձր կարծիք ունի` թե՛ որպես երկրի նախագահի, թե՛ որպես մարդու: «Ազատություն» ռադիոկայանի ֆեյսբուքյան ասուլիսում նախարարն ասաց, որ իրեն դուր է  գալիս նախագահի գործելակերպը, որովհետև իրեն վստահել են մի մեծ ոլորտ, և ինքն ունի վստահության մի բարձր չափաբաժին` կուտակված խնդիրները լուծելու:

Հարցին, թե չի՞ փոշմանել, որ նշանակվել է այդ պաշտոնին, Ամիրյանը պատասխանեց` ոչ: «Ես առավել քան վստահ եմ իմ քայլերում և տեսնում եմ անելիքները ու գիտեմ, որ ամեն բան լավ է լինելու: Գալիս է կյանքում մի պահ, երբ կուտակված փորձը, կապերը պետք է ծառայեցնել այն բնագավառին, որտեղ քո կարիքը կա: Ես եկել եմ` երկարատև գործ անելու»:

Մեկ այլ հարցի, թե չի՞ պատրաստվում անդամակցել ՀՀԿ-ին, պատասխանեց, որ ժամանակը կգա` կիմանանք: «Թիմային աշխատանքը շատ կարևոր է, թիմային պատասխանատվության խնդիր է»,- հավելեց Ամիրյանը: