Դաշնակցական երիտասարդները հերթական անգամ տապալել են Աթաթուրքին նվիրված միջոցառումը

Կալիֆորնիայում դաշնակցական երիտասարդները տապալել են Թուրքիայի Հանրապետության հիմնադիր, երկրի առաջին նախագահ Քեմալ Աթաթուրքին նվիրված ևս մեկ միջոցառում, որը կազմակերպվել է նոյեմբերի 9-13-ը՝ «Աթաթուրքի շաբաթ» միջոցառումների շրջանակներում:

ԱՄՆ ՀՅԴ Երիտասարդական միության ֆեյսբուքյան էջից տեղեկանում ենք, որ Կալիֆորնիայի «Չափման» համալսարանում Աթաթուրքի մասին դասախոսության պահին հայ երիտասարդները «ներխուժել են» լսարան՝ մեջքով շրջվելով դեպի թուրքերը: Երիտասարդներն սկսել են բարձրաձայն վանկարկել «Ամոթ Աթաթուրքին, ամոթ Թուրքիային», ինչը դասախոսությունը լսող ազգայնամոլ թուրքերի շրջանում մեծ վրդովմունք է առաջացրել:

ԱՄՆ ՀՅԴ Երիտասարդական միության էջում տեղադրված տեսանյութում պարզ երևում է, թե ինչպես են կատաղած թուրքերը փորձում հարձակվել հայ երիտասարդների վրա, թքում, հայհոյում՝ փորձելով հակադարձել տղաներին: Ներկաներից մեկն անգամ հանդգնում է միջնամատ ցույց տալ երիտասարդ հայորդուն:

Չկորցնելով իրենց՝ հայորդիները թևանցուկ շարունակում են ցույցը՝ հասնելով իրենց բուն նպատակին` տապալել Աթաթուրքի մասին դասախոսությունը: Չկարողանալով հակառակվել հայ երիտասարդներին՝ հավաքված ամբոխը ստիպված լքում է դահլիճը:

Հիշեցնենք, որ երեկ Կալիֆորնիայի «Նորթրիջ» նահանգային համալսարանում ՀՅԴ անդամ հայ ուսանողները նունպես տապալել էին Աթաթուրքի մասին դասախոսությունը: Այն պահին, երբ Աթաթուրքի և թուրքական քարոզչությունն իրականացնելու համար դասախոսը մտել էր լսարան, հայ ուսանողները մեջքով շրջվել էին դեպի նա՝ վանկարկելով «Ցեղասպանությունը ժխտվում է», «Թուրքիան մեղավոր է Հայոց ցեղասպանության համար»:  Դասախոսը ստիպված լքել էր լսարանը:

Նշենք նաև, որ ՀՅԴ ԱՄՆ-ի միությունը նաև կոչ է արել միանալ հայկական, քրդական, եզդիական և մարդու իրավունքների կազմակերպություններին՝ արտահայտելու Էրդողանի և նրա կուսակցության կողմից քրդամետ Ժողովուրդների դեմոկրատական կուսակցության համանախագահների և պատգամավորների դեմ ոտնձգությունները: