Կառավարությունը դիտարկում է փոխմարզպետերի հաստիքների կրճատման հարցը

ԱԺ հանձնաժողովները շարունակում են 2017 թվականի պետական բյուջեի նախագծի քննարկումները: Կառավարության աշխատակազմի ղեկավար-նախարար Դավիթ Հարությունյանը ներկայացրեց կառավարության ոչ ֆինանսական ցուցանիշները:

ԱԺ պատգամավոր Էդմոն Մարուքյանը հարցրեց փոխմարզպետերի կրճատման մասին: Նա նշեց, որ փոխմարզպետերի հաստիքների կրճատման անհրաժեշտության առաջարկով դիմել էր նախորդ վարչապետին, նաև` ներկայիս վարչապետին: Ըստ Մարուքյանի` փոխմարզպետերի հաստիքները կարելի է դիտարկել ուռճացված ծախսերի համատեքստում: «Սպասվո՞ւմ են, արդյոք, նման կրճատումներ»,- հարցրեց նա:

Դավիթ Հարությունյանը պատասխանեց, որ Մարուքյանի գրավոր առաջարկի հիման վրա վարչապետ Կարեն Կարապետյանն արդեն հանձնարարական է տվել, որ մարզպետերը ներկայացնեն, թե որ մարզում քանի փոխմարզպետի հաստիք է գործում` ներկայացնելով նրանց աշխատանքի արդյունավետությունը: Նա նշեց, որ մարզպետերի առաջարկից հետո նոր միայն վարչապետը կկայացնի որոշում այդ հաստիքների կրճատման վերաբերյալ:

«Ոչ ուշ, քան մեկ ասմվա ընթացքում կստանաք Ձեր առաջարկության պատասխանը»,- Մարուքյանին ասաց Դավիթ Հարությունյանը: