«Փոփոխություններից ակնկալիք ունենալու համար պետք է ֆանտազյոր լինել կամ ուտոպիստ»

Կարելի է անվանափոխություն անել, բայց մեջը փոփոխություն չլինի, կարելի է ունենալ դեմոկրատական կուսակցություն, որը բոլշևիկյան է. լրագրողների հետ զրույցում, խոսելով կառավարման համակարգում տեղի ունեցող փոփոխությունների մասին, ասաց երգիչ, երգահան Արտավազդ Բայաթյանը:

Ըստ նրա` կարևորագույն խնդիրը` լուստրացիան, այդպես էլ մնաց չլուծված, ուստի փոփոխություններից ինչ-որ բան ակնկալելը զուր է:

«Մեկը մյուսին եկավ փոխարինելու, իսկ հիմքը չփոխվեց: Այս դեպքում փոփոխություններից ինչ-որ ակնկալիք ունենալու համար կա\'մ պետք է ֆանտազյոր լինել, կա\'մ ուտոպիստ: Մեր հիմքը պետք է առողջ լինի, իսկ մենք տեսնում ենք, որ լավագույններին այստեղ ուղղակի փչացնում են: Ես մի երգ ունեմ` «Եվ վաղն ամեն ինչ կսկսվի նորից», այն շատ արդիական է մեր օրերի համար»,- ասաց Բայաթյանը:

Նրա կարծիքով` կարևոր է, որ երկրում օրենքները բոլորի համար լինեն, և եթե փոփոխություններ ենք ակնկալում, պետք է գան մարդիկ, ովքեր կաշառակերության, թալանի ախտով չեն տառապում: