Հերոսների, առաքյալների վրա հույս չեմ դնում. Գուրգեն Արսենյանի «ակնկալիքը»՝ Կարեն Կարապետյանից

ԱԺ ԲՀԿ խմբակցության պատգամավոր, Միավորված աշխատանքային կուսակցության նախագահ Գուրգեն Արսենյանը Yerkir.am-ի հետ զրույցում, խոսելով Հովիկ Աբրահամյանի հրաժարականի մասին, նշեց, որ որևէ կառավարություն չի կարող մշտական լինել:

Մեր հարցին, թե անձերի փոփոխությամբ որևէ բան կարո՞ղ է փոխվել,  պատասխանեց. «Ինքներդ  պատասխանեցիք Ձեր հարցին»:

Դիտարկմանը՝ ստացվում է, որ այս փոփոխությունն անիմաստ է դառնում, Արսենյանը պատասխանեց, որ որևէ փոփոխություն չի կարող անիմաստ լինել: «Պետք է նպատակ դնել ու ձգտել այդ նպատակի կատարմանը: Ժամանակ է պետք դրա համար, սրա իմաստը կամ անիմաստությունը ժամանակի մեջ է երևալու: Պետք է կառավարության գործունեության ծրագիր բերվի, ըստ  ծրագրի` մենք կենթադրենք և հետևություններ կանենք՝ որն է այս փոփոխության իմաստը»,- ասաց պատգամավորը:

Նա Հովիկ Աբրահամյանի երկու տարվա գործունեությունը գնահատեց «սովորական»: «Սովորական, բան չի փոխվել առանձնապես, նախորդի համեմատ` ինչ-որ բան չի փոխվել»,- ասաց Արսենյանը:

Հարցին, թե վարչապետի ամենահավանական թեկնածուն Կարեն Կարապետյանն է, ի՞նչ ակնկալիքներ կան նրանից, պատգամավորը պատասխանեց. «Ես, որպես կանոն, հերոսների, առաքյալների վրա հույս չեմ դնում: Ես հույս դնում եմ մեր երկրի,  ժողովրդի կամքի ու համառության վրա»: