Քոչարյանի ժամանակ Ադրբեջանն իրեն երբեք այդքան լկտի ու սանձարձակ չի պահել. Ստեփան Մարգարյան

Այսօր լրագրողների հետ զրույցում ԱԺ պատգամավոր, «Համախմբում» կուսակցության անդամ Ստեփան Մարգարյանը անդրադարձավ ՀՀ երկրորդ նախագահ Ռոբերտ Քոչարյանի` երեկ տված հարցազրույցին, որում նա խոսել է ԼՂ կարգավորման, ՀՀ ներքին ու արտաքին քաղաքականության մարտահրավերների մասին:

Ստեփան Մարգարյանի համոզմամբ` դա մի մարդու հարցազրույց էր, որը շատ լավ գիտի երկիրը, 10 տարի ղեկավարել է այն, ու դրանից առաջ էլ ԼՂՀ նախագահ է եղել, ուստի խնդիրների մասին ավելի լավ, քան նա, որևէ մեկը չէր կարող պատկերացում ունենալ:

«Ռոբերտ Քոչարյանն իր անհանգստություններն է հայտնել Հայաստանի ու Արցախի առաջ կանգնած մարտահրավերների մասին, և նրա տեսակետները ապրելու իրավունք ունեն»,- ասաց պատգամավորը:

Դիտարկմանը, որ Քոչարյանի հարցազրույցը միշտ բացասական ալիք է առաջ բերում, Ստեփան Մարգարյանը չհամաձայնեց` ասելով, որ հասարակության մեջ ինքը որևէ բացասական ալիք չի տեսնում, և որ բացասական ալիքը առկա է միայն ուղղորդված մամուլում: Այն բանին, որ հասարակությունը քննարկում է նաև Ռոբերտ Քոչարյանի կառավարման տարիներին թույլ տրված սխալները, Ստեփան Մարգարյանն այսպես արձագանքեց. «Իհարկե, նրա կառավարման տարիներին բացասական բաներ եղել են: Բայց եթե ինչ-որ ժամանակ ինչ-որ վատ բաներ են եղել, դա չի նշանակում որ հիմիկվա վատ բաները պետք է արդարացնել այն ժամանակվա վատ բաներով: Լավ, կրա՞կն ենք ընկել, որ ինչ-որ ժամանակ ինչ-որ վատ բան է եղել: Հիմա պետք է բոլորը վատ բա՞ն անեն»,- ասաց նա:

Պատգամավորը շեշտեց, որ Քոչարյանի կառավարման ժամանակ նաև լավ բաներ են եղել, օրինակ` այն ժամանակ Ադրբեջանը երբեք այդքան լկտի ու սանձարձակ չի պահել իրեն, ինչպես հիմա է պահում, այն ժամանակ ռիսկ չի արել հարձակվել Արցախի վրա, և որ այն ժամանակ հայությունն այդքան վտանգված չի զգացել իրեն, ինչպես հիմա: Ըստ Մարգարյանի` ապրիլյան պատերազմը ցույց տվեց, որ այսպես չի կարող շարունակվել, և համակարգային փոփոխությունները օդի պես անհրաժեշտ են, ու դա դարձել է համազգային պահանջ:

«Հենց Ռոբերտ Քոչարյանը խոսում է, բոլորը դա կապում են քաղաքականություն վերադառնալու հետ և ինձ հարցնում` վերադառնո՞ւմ է, թե՞ ոչ: Ես չգիտեմ այդ հարցի պատասխանը: Նա քաղաքական գործիչ է, ով մեծ ավանդ ունի Հայաստանի քաղաքական կյանքում և կարող է հայտարարել քաղաքականություն վերադառնալու կամ չվերադառնալու մասին»,- ասաց նա:

Իսկ թե հնարավո՞ր է, որ Ռոբերտ Քոչարյանը «Համախմբում» կուսակցության միջոցով փորձի վերադառնալ, Ստեփան Մարգարյանը պատասխանեց. «Սպասենք, կտեսնենք, ես ճիշտ չեմ համարում ենթադրությունների տեսանկյունից խոսելը: Մենք ստեղծել ենք կուսակցություն, որի ղեկավար մարմիններում պարոն Քոչարյանը չկա: Եթե համագործակցության մասին եք խոսում, ապա Ռոբերտ Քոչարյանը չի հայտարարել այն մասին, որ վերադառնում է քաղաքականություն, որ մենք էլ քննարկենք համագործակցելու հարցը: Կլինի՞ նման հայտարարություն, մենք դա մեր կուսակցությունում կքննարկենք»: