Սահմանադրական փոփոխությունների գործընթացը չպետք է հասնի մինչև հանրաքվե. Ստեփան Մարգարյան

Սիսիանում մեկնարկած իրազեկման հանրահավաքի ժամանակ ԱԺ ԲՀԿ խմբակցության պատգամավոր Ստեփան Մարգարյանը հայտարարեց. «Եկել ենք Սիսիան ոչ թե որևէ բան տոնելու, այլ քննարկելու իրավիճակը, որը մեկ բառով կարելի է ասել՝  երկիրը փլուզվում է գործող իշխանությունների սխալ քաղաքականության պատճառով:

Ժողովրդի մեծամասնությունը տոկոսի տակ է իշխանությունների վարած սխալ քաղաքականության շնորհիվ: Սա ժողովրդի ապրելակերպ չէ, եթե ուզում ենք այս ամենի վերջը տալ, ուրեմն չպետք է թույլ տան վերարտադրությունը այս իշխանությունների: Մեր սահմանադրությունը թույլ չի տալիս, որ որևէ իշխանություն վերարատադրվի: Ունենք գնացող նախագահ, որի հետ պետք է փոխվի ողջ քաղաքական  իշխանությունը: Սա որպեսզի տեղի չունենա, իշխանությունները նախաձեռնել են սահմանադրական փոփոխություններ, որ իշխեն խորհրդարանում հավերժ: Սա չպետք է թույլ տալ, պետք է արգելել սահմանադրական  փոփոխությունները, ոչ թե բոյկոտել կամ դեմ քվեարկել, այլ չպետք է թույլ տանք պրոցեսը հասնի  հանրաքվեի»,- ասաց Ստեփան Մարգարյանը:

Նա խոսեց կուտակային բարեփոխումների անարդյունավետության մասին, գազի ու էլեկտրաէներգիայի բարձր վարձավճարների մասին, և որ մարդիկ չեն կարողանում մուծել կոմունալ վարձերը:

«Բազմաթիվ գազաֆիկացված գյուղերում մարդիկ ոչ թե գազ, այլ աթար են օգտագործում, որովհետև չունեն գազի դիմաց վճարելու հնարավորություն»,- ասաց Ստեփան Մարգարյանը:

Նա անդրադարձավ նաև տխրահռչակ կարմիր գծերին ու արագաչափերին, որոնց արդյունքում մարդկանց թալանում են: «Մեր փողերով սարքած ասֆալտի համար վճարում ենք, որովհետև դրա վրա կարմիր գծեր են քաշել»,- ասաց նա:

Խոսվեց նաև Հայաստանի արտաքին  պարտքի մասին, որովհետև եթե 5 միլիարդի շեմին հասնող արտաքին պարտքը չլիներ, կբարձրացվեին մարդկանց աշխատավարձերը, և կբարելավվեր մարդկանց կյանքը, այնինչ` երեխաները ծնվում են` արդեն պետական պարտքը վզին:

Վերջում  Ստեփան Մարգարյանը հայտարարեց, որ պետք է կանգնեցնել սահմանադրական փոփոխությունների գործընթացը: