«Հորտուս Մուզիկուսը» կժամանի Հայաստան

«Հորտուս Մուզիկուս» անվանումը բազում տասնամյակներ կատարողական արվեստի բարձրագույն նշաձող և խորհրդանիշ է: Այն համարվում է Եվրոպայի մշտապես գործող ամենահին խումբը` իր յուրահատուկ ոճով: «Շողացող վերածնունդ, փայլուն բարոկկո» ծրագիրը դարերի խորքից մինչ այսoր մի մեծ երաժշտական ճանապարհորդություն է: Խումբը թողարկել է 35 ձայնասկավառակ, համերգներով հանդես եկել մոլորակի բոլոր մայրցամաքներում: Երաժշտախմբի յուրաքանչյուր ելույթ` միջնադարյան հագուստների և յուրօրինակ գործիքների օգտագործմամբ, վերածվում է մի բեմականացման:

Սեպտեմբերի 14-ին «Արամ Խաչատրյան» համերգասրահում, «Երևանյան հեռանկարներ» միջազգային երաժշտական փառատոնի շրջանակներում, հայ երաժշտասեր հանրությունը ևս հնարավորություն կստանա ներկա գտնվելու այս բացառիկ երաժշտական ճամփորդությանը` մեր օրերի ամենախարիզմատիկ երաժիշտներից մեկի` Անդրես Մուստոնենի և «Հորտուս Մուզիկուս» խմբի երաժիշտների մասնակցությամբ:

«Հորտուս մուզիկուս» երաժշտախումբը սեպտեմբերի 15-ին նաև ելույթ կունենա «Բյուրական» արվեստի ակադեմիայում մեկ այլ յուրահատուկ ծրագրով, որի ընթացքում կհնչեն հրեական երգեր ու ավանդական երաժշտություն, հատվածներ «Կարմինա Բուրանա» ձեռագրերի շարքից: