Հայաստան կժամանի ԱՄՆ կոնգրեսական. Alphanews.am

Հայաստան կժամանի ԱՄՆ կոնգրեսական, բայց ոչ Ադամ Շիֆը: Այս մասին Գլենդելում Alpha News-ի թղթակցին հայտնել են բողոքի ակցիայի մասնակիցները։

Այն բանից հետո, երբ Գլենդելի և Բըրբենքի հայ համայնքի ներկայացուցիչները հանդիպել են ԱՄՆ կոնգրեսական Ադամ Շիֆի հետ, նրանք որոշել են իրենց բողոքի ակցիաները Բըրբենքից, որտեղ գտնվում է կոնգրեսականի գրասենյակը, տեղափոխել Գլենդել՝ Արցախի փողոց:

Բացի այդ, Շիֆը մասնակիցներին տեղեկացրել է, որ շուտով Հայաստան կմեկնի ամերիկացի կոնգրեսական:

Հիշեցնենք, որ արդեն մի քանի օր է, ինչ ԱՄՆ հայ համայնքի ներկայացուցիչները նստացույց են անցկացնում Գլենդելում՝ Ադամ Շիֆի գրասենյակի դիմաց՝ պահանջելով կոնգրեսականից մեկնել Հայաստան: Նրանք փակել են Գլենդել-Բըրբենք մայրուղին և Ադամ Շիֆից պահանջել ընդունել իրենց։

Ակցիայի մասնակիցները նշում էին, որ կոնգրեսականը պետք է այցելի Լաչինի միջանցք, որպեսզի անձամբ համոզվի, որ իրավիճակը կրիտիկական է և հարցը բարձրացնի Կոնգրեսում:

Ամերիկահայերը պահանջում են նաև կոշտ պատասխան տալ Ադրբեջանի գործողություններին և պարտադրել բացել արդեն 8 ամիս փակված Արցախը Հայաստանին կապող ճանապարհը: