Չկա այն մարդը, որը կգա ու հողեր կհանձնի. Թեւան Պողոսյան

Այսօր լրագրողների հետ զրույցում Արցախից նոր վերադարձած` ԱԺ «Ժառանգություն» խմբակցության պատգամավոր Թևան Պողոսյանն անդրադարձավ Արցախի հիմնախնդրին, մասնավորապես` հարցին` իրատեսակա՞ն է համարում հողեր հանձնելու մասին խոսակցությունները:

«Մի քանի անգամ ասել եմ, որ չկա այն մարդը, որը կգա ու հողեր կհանձնի: Իսկ Արցախում այդ տեսակի տրամադրություններ չկան: Հանրային հարցում է անցկացվել` 99 տոկոսի մոտ  հող հանձնելու միտք չկա: Ես կառաջարկեմ` եթե որևէ մեկի մտքով նման սցենար է անցնում` հող հանձնելու, թող նստի մեքենան, ընդամենը 4 ժամ հետո Արցախում կլինի, թող գնա Արցախ ու փորձի հող հանձնել: Մնացած ամեն ինչը կախված է նրանից` արդյո՞ք մենք պատրաստ ենք «ոչ մի թիզ հող», «հզոր երկիր» գաղափարը կյանքի կոչել: Իսկ դա անում են աշխատանքով, ամենօրյա չարչարանքով, քանի որ, տանը նստած խոսելով, երկիրը չի հզորանալու: Այսօր ամենօրյա աշխատանքով  զբաղված Արցախի հանրությունը ամրացնում է բանակն ու սահմանները»,- ասաց Թևան Պողոսյանը:

Պատգամավորը ուրախ կլիներ, որ հայ հանրությունն աջակցեր Արցախում բանակի հզորացմանն ու առաջնագծի պաշտպանության ամրապնդմանը: Նաև` որ Հայաստանից շինարարական կամ համապատասխան տեխնիկա ունեցողները մեկնեին Արցախ, որ օր առաջ ավարտվեին առաջնագծի, երկրորդ ու երրորդ գծերի ամրապնդման հարցերը:

Պողոսյանի խոսքով` Հայաստան-Արցախ ներքին հզորությունը պետք է ապահովել այնքան, որ կարողանանք դիմակայել նաև արտաքին մարտահրավերներին: Ըստ նրա` Արցախում ոչ միայն ամրացնում են սահմանները, այլ նաև պատրաստվում են ապագա հնարավոր մարտահրավերներին, որովհետև վստահաբար ապրիլյան ռազմական գործողություններից անհրաժեշտ դասեր արդեն քաղել են, մնում է կարողանալ ձևավորել Հայաստան-Արցախ-Սփյուռք միասնականություն, խուսափել պառակտումներից ու փոխադարձ մեղադրանքներից: