Այն, որ մի օր մենք կտեսնենք Ռուսաստանի պատասխանը Թուրքիային, ես կասկած չունեմ. Թևան Պողոսյան

Այսօր թուրք-սիրիական սահմանին Թուրքիան ռուսական ռազմական օդանավ է խոցել: Թե ի՞նչ մարտահրավերներ է առաջադրելու այս միջադեպը, Yerkir.am-ի հետ զրույցում կարծիք է հայտնել «Ժառանգություն» խմբակցության պատգամավոր Թևան Պողոսյանը:

Նա նախ նշեց, որ նման միջադեպեր քիչ չեն եղել տարբեր կոալիցիաներում գտնվող երկրների միջև, ուստի ասել, որ հենց վաղը պատերազմ կսկսվի Ռուսաստանի ու Թուրքիայի միջև, անիմաստ է: Ըստ պատգամավորի` այսօր խնդիրը գտնվում է այլ դաշտում, որը կոչվում է սիրիական ճգնաժամ, և Ռուսաստանը կփորձի ճիշտ հաշվարկներ անել ու որոշել, թե երբ է գալու Թուրքիային համարժեք պատասխան հասցնելու ժամանակը:

«Ինձ չի թվում, թե Ռուսաստանն անմիջապես կպատասխանի այդ միջադեպին: Նախ կլինեն դիվանագիտական «կրակոցներ»: Թուրքիան կփորձի արդարանալ, ասել, որ ռուսական օդանավն իր տարածքն է ներխուժել: Ամեն դեպքում այս միջադեպը սեպ կխրի Ռուսաստան-Արևմուտք հարաբերությունների կարգավորման մեջ»,- ասաց Թևան Պողոսյանը` հավելելով, որ Ռուսաստանը բացահայտ ասում էր, որ ԻՊ-ի ֆինանսավորման մեջ մեղավոր է Թուրքիան:

Ըստ Թևան Պողոսյանի` այս միջադեպից հետո կընթանա ավելի շատ սառը հաշվարկ, որի հիման վրա կփորձեն շահերի վերադասավորում իրականացնել ու ավելի մեծ խնդիրներ լուծել, և երբ կգա հարմար պահը, Ռուսաստանը նաև իր պատասխանը կտա Թուրքիային:

Նշենք, որ Թուրքիայի կողմից ռուսական ռազմական օդանավի խոցման միջադեպի կապակցությամբ այսօր երեկոյան հրավիրվելու է ՆԱՏՕ-ի խորհրդի նիստ: Թևան Պողոսյանի խոսքով` Թուրքիան հիմա փորձելու է թե\' ՆԱՏՕ-ի նիստ հրավիրել, թե\' ՄԱԿ-ին դիմել` արդարանալով, որ իր օդային սահմանն է հատվել, որ ռուսական օդանավերը կարող էին հարված հասցնել, և Թուրքիան պաշտպանվել է: Ըստ պատգամավորի` Թուրքիայի համար կարևոր է թույլ չտալ Իրան-Ռուսաստան հարաբերությունների բարելավում, մինչդեռ`  2 օր առաջ Վլադիմիր Պուտինը այցելել էր Թեհրան:

«Ինձ չի թվում, որ Ռուսաստանը դուրս է գալու Սիրիայից, մինչև վերջ տանելու է իր պայքարը ԻՊ-ի դեմ: Ֆրանսիան էլ ավելի կներգրավվի ԻՊ-ի դեմ ռազմական գործողություններում: Օլանդն արդեն սկսել է կոալիցիայի հանգեցնող ինչ-որ գործընթաց, հանդիպումներ անցկացրեց Վաշինգտոնում, այսօր երեկոյան պետք է Մոսկվայում Պուտինի հետ հանդիպեր: Այս ամենը հաշվի առնելով` Թուրքիան փորձեց այս միջադեպով խանգարել այդ գործընթացներին: Ինձ թվում է, որ այս միջադեպից հետո բոլոր կողմերը պետք է սառը դատե, և որոշումները կայացնեն` իրենց երկարատև շահերից ելնելով: Բայց այն, որ օրերից մի օր մենք կտեսնենք Ռուսաստանի պատասխանը Թուրքիային, ես կասկածներ չունեմ»,- եզրափակեց Թևան Պողոսյանը: