Գիշերը վիրավորված զինյալների վիճակը միջին ծանրության է. մանրամասներ

Ինչպես արդեն հայտնի է, այս գիշեր փոխհրաձգություն է տեղի ունեցել ոստիկանության և ՊՊԾ գունդը գրաված զինված խմբավորման անդամների միջև, որի հետևանքով զինված խմբի անդամներից երկու անձ վիրավորվել է:

Լրագրողների հետ զրույցում  Էրեբունի բժշկական կենտրոնի վերակենդանացման և ինտենսիվ թերապիայի բաժանմունքի գիտական ղեկավար Հարություն Մանգոյանը  նշեց,  որ գիշերը 02:50-ի սահմաններում շտապօգնության բրիգադները Էրեբունի բժշկական կենտրոն են տեղափոխել երկու տուժածի` Աշոտ Պետրոսյանին` 1966թ ծնված, ով ունեցել է  զույգ ստորին վերջույթների հրազենային վիրավորում, աջ ազդրոսկրի կետրվածք, և Հովհաննես Հարությունյանին` 1986թ  ծնված, ով ունեցել է աջ ազդրոսկրի գնդակային վիրավորում և աջ սրունքի միջանցիկ գնդակային վիրավորում`  սրունքի կոտրվածքով:

Նրանց ցուցաբերվել է առաջին օգնություն, կատարվել է բժշկական հետազոտություն, տեղափոխվել են վիրասրահ, որտեղ կատարվել է վերքերի առաջնային վիրաբուժական մշակում :

«Այս պահին վիճակը գնահատվում է, որպես միջին ծանրության, կայուն է, երկոնս էլ գիտակից են: Վերակենդանացման փուլը երկար չի տևի, որովհետև  վիճակը միջին ծանրության է: Իսկ կոտրվածքները ստացել են հրազենային վիրավորման արդյունքում»,- ասաց Հարություն Մանգոյանը: