Վլադիմիր Գասպարյանը չի մասնակցում բանակցություններին. Հունան Պողոսյանը ներկայացրեց իրավիճակը

Իրավիճակը ՊՊԾ-ում մնում է նույնը. այս մասին քիչ առաջ Խորենացի փողոցում գտնվող լրագրողներին հայտնեց ՀՀ փոխոստիկանապետ Հունան Պողոսյանը եւ հղում անելով ԱԱԾ-ի տարածած այսօրվա հայտարարությանը նշեց, որ երեկ օրվա ընթացքում բանակցությունների արդյունքում ազատ են արձակվել երկու հոգի՝ մեկը պարեկապահակային ծառայության աշխատակից, մյուսը՝ շտապօգնության մեքենայի վարորդ:

Հունան Պողոսյանը հայտարարեց, որ ներկայումս համապատասխան միջոցառումները շարունակվում են իրավապահների կողմից: Այս պահին ՊՊԾ շենքում է գտնվում 5 պատանդ ոստիկան: Ըստ Պողոսյանի, երկու կողմերի պահանջները շարունակում են մնալ նույնը: Փոխոստիկանապետը նաեւ հայտարարեց, որ բանակցություններին Ժիրայր Սեֆիլյանը չի մասնակցում, առայժմ նրա հետ հանդիպում չի կազմակերպվել:

Երկու կողմի բանակցություններին չի մասնակցում նաեւ ոստիկանապետ Վլադիմիր Գասպարյանը: Ոստիկանության կողմից, ըստ Պողոսյանի, մասնակցում է, «համապատասխան կոնտակտային սպա»:

«Ոստիկանությունն ի վիճակի է ձեռնարկել օրենքով թույլատրելի բոլոր միջոցառումները: Փոխզիջումների գնալու տարբերակը պետք է լինի երկուստեք»,-եզրափակեց Պողոսյանը