Ով մեղավոր է, խստագույնս կպատժվի. Հունան Պողոսյանը` Պերմյակովին հայտնաբերելու գործում թերանալու մասին

Նախաքննությամբ ձեռք բերված տվյալների արդյունքում, եթե անհրաժեշտություն լինի, բնականաբար, ծառայողական քննություն կիրականացվի, ով մեղավոր է այդ հարցում, անխտիր խստագույնս կպատժվի: Այս մասին այսօր լրագրողների հետ հանդիպման ժամանակ հայտարարեց ՀՀ ոստիկանապետի առաջին տեղակալ Հունան Պողոսյանը` պատասխանելով այն հարցին, թե չի՞ կարծում, որ ոստիկանության ոչ արդյունավետ քայլերի արդյունքում է, որ Վալերի Պերմյակովը հայ իրավապահների կողմից չի հայտնաբերվել:

«Ես և’ դեպքի օրը, և’ դեպքի հաջորդ օրը հնարավորություն եմ ունեցել դրա մասին խոսելու, այսօր էլ իմ կարծիքը չի փոխվել: Ես նշեցի և այսօր էլ նշում եմ, որ պետք չէ թյուր կարծիք ստեղծել, որ որևէ գերատեչություն, այդ թվում` ոստիկանությունը լավ չի աշխատել: Ընդհակառակը` համագործակցված աշխատել են բոլոր կառույցները, իրավապահ ողջ համակարգը, ես նշեցի՝ մեր բոլոր գործընկերները՝ ազգային անվտանգության ծառայությունը, դատախազությունը, քննչական կոմիտեն: Պետք է համադրել և նախաքննությունից ունենալ բոլոր այն տվյալները, նոր դրանից հետո հետևություններ և եզրահանգումներ անել»,- ասաց նա:

Փոխոստիկանապետի խոսքով ՝ դեպքից հետո ստացել են բազմաթիվ ահազանգեր, որոնք բոլորը ստուգվել են: «Ահազանգեր ենք ստացել ոչ միայն Գյումրիում, այլև Արագածոտնի, Արմավիրի մարզում, Երևանից, նաև սահմանապահներին զգուշացվել է ևս մեկ անգամ զգոն լինել: Ոստիկանական կարգախմբերը մանրակրկիտ ուսումնասիրել են տարածքը»: