Նորմալ բանակցություններ են ընթանում. Հունան Պողոսյանը ցուցարարներին հորդորեց չլարել իրավիճակը

Նորմալ բանակցություններ են ընթանում, եւ հիմա դուք ձեր քայլով ավելորդ լարվածություն եք մտցնում իրավիճակում: Ազատության հրապարակից Հյուսիսային պողոտա հասած ցուցարարներին, ովքեր ամեն գնով փորձում էին ճեղքել ոստիկանական պատն ու երթով ուղղվել դեպի Էրեբունի` ՊՊԾ գնդի տարածք, վստահեցրեց փոխոստիկանապետ Հունան  Պողոսյանը: Ցուցարարների պնդմանը, թե իրենք ուզում են գնալ Էրեբունի, որպեսզի  այնտեղ ուժ չկիրառվի, փոխոստիկանապետը ասաց. «Ես ձեզ վստահեցնում եմ, որ ուժ չի կիրառվելու: Նորմալ բանակցություններ են ընթանում: Դուք տեսնում եք, որ բոլորս ենք մտահոգ, ոչ միայն դուք:  Տեսնում եք` ոստիկանների, իմ դեմքի մտահոգությունը: Պետք չի լարել իրավիճակը»: 

Բանակցություններից հետո ցուցարարները վերադարձան Ազատության հրապարակ: