37-ամյա մոր ու նրա անչափահաս երեխաների սպանության մեջ կասկածվողը համագյուղացի է. մանրամասներ

Արդեն հայտնել ենք,  որ Ախալքալաքի շրջանի Վաչիան գյուղում հայ ընտանիք է սպանվել, մահացած են գտել 37-ամյա կնոջ ու նրա 3 անչափահաս երեխաներին:

Վրաստանի խորհրդարանի հայ պատգամավոր Սամվել Պետրոսյանը Yerkir.am-ին  դեպքի մասին որոշ մանրամասներ պատմեց: Նրա խոսքով` երեխաները 5, 14 և 18 տարեկան են եղել: «Դեպքը  եղել է երեկ չէ առաջին օրը` գիշերը: Հանցագործն ուզեցել է հետքերը թաքցնել, սակայն Ախալքալաքի շրջանի ոստիկանությունը  օպերատիվ միջոցների է դիմել, և մոտ մեկ ժամ առաջ այդ հանցագործությունը բացահատվել է: Ձերբակալվել է տղամարդ: Քիչ առաջ եմ կապվել ոստիկանության հետ և ասեմ, որ  շատ  հավանական է, որ, բացի մեկից,  էլի մասնակիցներ են եղել: Քննությունը գնում է,  ոստիկանությունն աշխատում է»,- ասաց Պետրոսյանը:

Նա պատմեց նաև, որ սպանվածները գյուղի` միջին  պայմաններում ապրողներ էին: «Ընտանիքի հայրն այս պահին գտնվում է Ռուսաստանում` գնացել է  արտագնա աշխատանքի: Նորմալ ընտանիք էր, էդ ընտանիքից ոչ մի վատ բան մենք չենք տեսել: Ձերբակալված տղամարդն էլ նույն գյուղից է, բայց թե ինչի՞ համար է նման ոճրագործություն արել, հայտնի չէ: Գործընթացը հիմա գնում է, կպարզվի»,- եզրափակեց Վրաստանի խորհրդարանի հայ պատգամավորը: