Տեր չեն կանգնել, տենց ա եղել. գյուղապետը` հոշոտված ոչխարների մասին

Արդեն հայտնել ենք, որ այսօր` հուլիսի 4-ին, տեղեկություն է ստացվել, որ Լոռու մարզի Ուռուտ գյուղի տներից մեկի անասնագոմում գայլերը հոշոտել են գյուղացուն պատկանող 17 գլուխ ոչխար, վնասել՝ 4-ը:

Ուռուտի գյուղապետ Սերգո Ջուլհակյանը Yerkir.am-ին պատմեց, որ գայլերը կարողացել են ներխուժել անասնագոմ ու հոշոտել ոչխարներին, քանի պատուհանները բաց են եղել:

«Անասնագոմը տանից մոտ հարյուր մետր հեռու է, չեն զգացել, պատուհանն էլ բաց են թողել, գայլերն էլ եկել-մտել են, էլի: Սկզբում ասում էին` 21 ոչխար է վնասվել, հետո ուրիշ թիվ ասացին, ես գլուխ չեմ հանում արդեն: Համ էլ փոխհատուցման մասին ասեմ, որ չեմ պատկերացնում` ինչ փոխհատուցում: Տեր չեն կանգնել, տենց ա եղել, ի՞նչ  փոխհատուցում»,- ասաց գյուղապետը, ապա հավելեց, որ, բացի այդ ոչխարներից, վնաս կրած ընտանիքն ունի առնվազն 100 գլուխ տարբեր տեսակի ընտանի կենդանիներ:

Ջուլհակյանը նշեց նաև, որ վնաս կրած ընտանիքն նյութապես ապահովված է: «Հինգ-վեց ավտո ունեն, նորմալ ապրում են, ուղղակի անուշադիր են եղել, գայլերն էլ հոշոտել են իրենց կենդանիներին»,- ասաց նա: