Ըստ Սերգո Կարապետյանի` ոչխարների արտահանման մենաշնորհ չկա

ԱԺ «Ժառանգություն» խմբակցության ղեկավար Զարուհի Փոստանջյանը համարում է, որ եկել է ժամանակը, որ գյուղատնտեսական շուկաներ հիմնվեն ոչ միայն Երևանում, այլ նաև սահմանամերձ շրջաններում, երկրի հարավում` Մեղրիում, որպեսզի գյուղացիները արտոնյալ պայմաններով իրենց մթերքն իրացնեն հենց այդ շուկաներում: Այս խնդրի մասին Փոստանջյանը բարձրաձայնեց ԱԺ-ում 2014 թ. բյուջեի քննարկումների ժամանակ:

Գյուղատնտեսության նախարար Սերգո Կարապետյանի խոսքով` նպատակահարմար չէ մարզերում շուկաներ հիմնել, քանի որ գյուղացիները գնորդ չեն ունենա:

Զարուհի Փոստանջյանը նշեց, որ խոսքը չի վերաբերում մանրածախ առևտրին, այլ մեծածախին սահմանամերձ հատվածում, որպեսզի գյուղացիները արտոնյալ պայմաններում կարողանան իրենց մթերքը արտահանել կամ վաճառել վրացիներին ու իրանցիներին: Այս ամենը, ըստ Զ.Փոստանջյանի, կխթանի գյուղատնտեսության արտադրողականությունը: Պատգամավորը նաև հայտնեց, որ Սյունիքի մարզի գյուղացիներից բողոքներ են ստացվել, որ ոչխարների արտահանման ոլորտում մենաշնորհ կա, դրանով զբաղվում է նախագահի եղբայրը` Ալեքսանդր Սարգսյանը, և գյուղացիները չեն կարողանում ոչխար արտահանել Վրաստան ու Իրան:

Գյուղնախարարը վստահեցրեց. «Գյուղատնտեսության մեջ մենաշնորհ չկա, իսկ գյուղացիներից բողոքներ չենք ստացել»: