Աբովյանի «Կոտայք» ֆուտբոլային ակումբը վերածնվում է

Հայկական ֆուտբոլում մեծ  ավանդույթներ ունեցող ակումբներից մեկը` Աբովյանի «Կոտայք»-ը վերածնվում է:  

Աբովյանը ներկայացնող թիմի հարցերով զբաղվում է փորձառու մարզիչ Սամվել Պետրոսյանը, ով armsport.am-ի զրույցում հաստատել է  այդ տեղեկությունն ու նշել, որ գալիք մրցաշրջանում թիմը հանդես կգա Առաջին խմբում:

«Մենք վերականգնում ենք «Կոտայքը», ստեղծում ենք նոր թիմ: Կոտայքը ֆուտբոլային մարզ է, իսկ համանուն թիմը` ֆուտբոլային բրենդ: Կոտայքում բնակվող մարդիկ ֆուտբոլի մեծ երկրպագուներ են:  Մոտ օրերս դիմելու ենք ֆեդերացիա, որպեսզի գրանցենք ակումբն ու մրցելույթներին մասնակցելու պաշտոնական թույլտվություն ստանանք:  Ունենք հովանավորներ, ովքեր արտասահմանից են ու իմ ընկերներն են: Առայժմ անուններ չեմ կարող տալ: Միայն կասեմ, որ Եվրոպայից են:

Որքանով տեղյակ եմ, ՈւԵՖԱ-ն նորաստեղծ ակումբներին թույլ չի տալիս անմիջապես մասնակցել Բարձրագույն խմբին: Հարկավոր է այդ իրավունքը ձեռք բերել Առաջին խմբում հանդես գալով: Կան բացառություններ, բայց դրանք ֆինանսական խնդիրների կամ իրավահաջորդի դեպքում են լինում:  Անկախ դրանից`մենք ինքներս որոշել ենք մեր ելույթները սկսել Առաջին խմբից»-ասել է Պետրոսյանը: