Լիսկայի դեմ մահափորձի գործով կալանավորված Արա Բուդաղյանն արդարացվեց

Սյունիքի մարզպետ Սուրիկ Խաչատրյանի դեմ մահափորձի գործով մեղադրյալ Արա Բուդաղյանը շուրջ մեկ տարվա կալանքից հետո, քննիչի որոշմամբ, արդարացվել է:

Yerkir.am-ին Բուդաղյանի պաշտպան, փաստաբան Հայկ Ալումյանը հայտնեց, որ նրա նկատմամբ քրեական հետապնդումը դադարեցվել է՝ հանցակազմի բացակայության հիմքով: Փաստաբանի խոսքով` թեև առավոտյան 9-ին քննիչը նման որոշում է ուղարկել, սակայն մինչ այս պահը սպասում են դատախազի որոշմանը, որպեսզի Բուդաղյանին ազատ արձակեն: Այս պահին Բուդաղյանը դեռ գտնվում է «Երևան Կենտրոն» ՔԿՀ-ում:

Նշենք, որ այս գործով մյուս երեք մեղադրյալները դեռևս կալանքի տակ են:

Հիշեցնենք, որ ԱԱԾ-ն այս գործով մեղադրանք է առաջադրել Սյունիքի մարզի 4 բնակչի: Մասնավորապես` Հենրիկ Ավագյանը, Գարեն Աթաջանյանը, Վիտալի Մինասյանը մեղադրվում են սպանության` պատվերով, ապօրինաբար երկու և ավելի անձանց դիտավորությամբ կյանքից զրկելու փորձ կատարելու (ՀՀ քրեական օրենսգրքի 34-104-րդ հոդվածի 2-րդ մասի 1-ին և 8-րդ կետեր), ինչպես նաև ապօրինի կերպով զենք և ռազմամթերք ձեռք բերելու, կրելու և պահելու համար (ՀՀ քրեական օրենսգրքի 235-րդ հոդվածի 1-ին մաս): Իսկ 2013-ի հունիսի 2-ին Սուրիկ Խաչատրյանի տան մոտ տեղի ունեցած կրակոցներից մահացած Ավետիք Բուդաղյանի կրտսեր եղբորը՝ Արա Բուդաղյանին, մեղադրանք է առաջադրել սպանության` ապօրինաբար մեկ ուրիշին դիտավորությամբ պատվերով կյանքից զրկելու փորձի դրդչության համար (ՀՀ քրեական օրենսգրքի 38-34-104-րդ հոդվածի 2-րդ մասի 8-րդ կետ):