Գորիսի քաղաքապետի նախկին թեկնածուն Լիսկայի դեմ մահափորձի գործով բացատրություն է տվել

Սյունիքի մարզպետ Սուրիկ Խաչատրյանի դեմ մահափորձի առթիվ հարուցված քրեական գործի շրջանակներում երեկ տասնյակ անձինք են հարցաքննվել: Այս մասին yerkir.am-ին հայտնեցին ՀՀ քննչական կոմիտեից: Երեկ հարցաքննվել է նաև Գորիսի քաղաքապետի նախկին թեկնածու Տիգրան Կարապետյանը:

Հիշեցնենք, որ նա Գորիսի Սդղի գյոլ տարածքում տեղի ունեցած ծեծկռտուքից հետո հայտարարությամբ էր հանդես եկել և Սուրիկ Խաչատրյանին ասել. «Խելքդ գլուխդ հավաքի, Լիսկա'»:

Ըստ մեր աղբյուրների՝ Տիգրան Կարապետյանը ծեծված Զաքարյանների՝ Ֆրանսիայում գտնվող եղբոր մտերիմ ընկերն է:

Yerkir.am-ի հետ զրույցում Տիգրան Կարապետյանը հաստատեց, որ երեկ իրեն ոստիկանություն են հրավիրել: «Միայն ինձ չեն կանչել, շատ մարդիկ են հրավիրել, ես էլ բացատրություն եմ տվել, ու վերջ»,- ասաց նա:

Կարապետյանը նշեց, որ դեպքի հնարավոր վարկածների մասին չի կարող  որեւէ բան ասել, իսկ ինչ վերաբերում է իր հայտարարությունը դեպքի հետ կապելուն, ասաց. «Ազատ մտածող մարդն էսօրվա իրականության մեջ խորթ ա»: