Լիսկայի դեմ մահափորձի գործով մեղադրյալի կալանքի երկարաձգման հարցը քննարկել են առանց նրա

Սյունիքի մարզպետ Սուրիկ Խաչատրյանի դեմ մահափորձի գործով մեղադրյալներից Գարեն Աթաջանյանի կալանքի ժամկետի երկարաձգման հարցը Կենտրոն և Նորք-Մարաշ վարչական շրջանների ընդհանուր իրավասության դատարանը քննարկել է առանց նրա և նրա պաշտպանի: Այս մասին yerkir.am-ին  հայտնեց Աթաջանյանի պաշտպան Վահան Հովհաննիսյանը՝ նշելով, որ իրենք են բոյկոտ հայտարարել և չեն մասնակցել նիստին: Եվ, չնայած մեղադրյալի բացակայությանը, ինչպես և սպասվում էր, դատարանը երկարաձգել է նրա կալանքի ժամկետը:

Նշենք, որ Կենտրոնի դատարանը բավարարել է ԱԱԾ-ի միջնորդությունն ու երկարաձգել գործով կալանավորված 4 անձանց կալանքի ժամկետը: ԱԱԾ-ն այս գործով մեղադրանք է առաջադրել Սյունիքի մարզի 4 բնակչի: Մասնավորապես` Հենրիկ Ավագյանը, Գարեն Աթաջանյանը, Վիտալի Մինասյանը մեղադրվում են սպանության` պատվերով, ապօրինաբար երկու և ավելի անձանց դիտավորությամբ կյանքից զրկելու փորձ կատարելու (ՀՀ քրեական օրենսգրքի 34-104-րդ հոդվածի 2-րդ մասի 1-ին և 8-րդ կետեր), ինչպես նաև ապօրինի կերպով զենք և ռազմամթերք ձեռք բերելու, կրելու և պահելու համար (ՀՀ քրեական օրենսգրքի 235-րդ հոդվածի 1-ին մաս): Իսկ 2013-ի հունիսի 2-ին Սուրիկ Խաչատրյանի տան մոտ տեղի ունեցած կրակոցներից մահացած Ավետիք Բուդաղյանի կրտսեր եղբորը՝ Արա Բուդաղյանին, մեղադրանք է առաջադրել սպանության` ապօրինաբար մեկ ուրիշին դիտավորությամբ պատվերով կյանքից զրկելու փորձի դրդչության համար (ՀՀ քրեական օրենսգրքի 38-34-104-րդ հոդվածի 2-րդ մասի 8-րդ կետ):