Իրենց հետապնդողներին ոչնչացնելու համար քուրդ զինյալները պայթեցրել են սեփական մեքենան. կան զոհեր և վիրավորներ

Երեկ հզոր պայթյուն է որոտացել ներկայիս Թուրքիայի տարածքում գտնվող հայկական Տիգրանակերտ քաղաքի Սուր շրջանում, որի հետևանքով, ըստ նախնական տվյալների, զոհվել է 4 և վիրավորվել 20 մարդ. տեղեկացնում է Demokrathaber-ը:

Ըստ պնդումների` Քուրդիստանի բանվորական կուսակցության զինյալների մի խումբ դեռևս անհայտ պատճառներով զենքի միջոցով սպառնացել է Յաքար և Յամար ընտանիքներին: Սպառնալիքներից հետո թաղի բնակիչները հետևել են այն մեքենային, որի մեջ եղել են ՔԲԿ-ականները: Նկատելով, որ հետապնդվում են, զինյալները ռումբ են տեղադրել իրենց մեքենայի մեջ, ապա այն լքել ճանապարհի եզրին ու փախուստի դիմել: Նրանք մեքենան պայթեցրել են այն պահին, երբ իրենց հետևող մեքենան անցնելիս է եղել: Պայթյունի հետևանքով 30 մետր շառավիղով և 5 մետր խորությամբ փոս է գոյացել: