Արցախի ճանաչմամբ մենք կանխում ենք շատ խնդիրներ. Զարուհի Փոստանջյան

Այսօր կառավարության նիստում հավանության արժանացավ ԱԺ պատգամավորներ Զարուհի Փոստանջյանի ու Հրանտ Բագրատյանի ներկայացրած` Արցախի Հանրապետությունը ճանաչելու մասին օրենքի նախագծի վերաբերյալ կառավարության եզրակացությունը:

Լրագրողների հետ զրույցում «Ժառանգություն» խմբակցության ղեկավար Զարուհի Փոստանջյանը նշեց, որ ԱԺ պատգամավորները հնարավորություն կունենան իրենց դիրքորոշումները ներկայացնելու թե' ԱԺ հանձնաժողովների նիստերում, թե' ԱԺ լիագումար նիստում:

«Այս պահի դրությամբ` ես տեսնում եմ դիրքորոշումների փոփոխություն, պատգամավորները դեմ չեն, որովհետև նախկինում նրանք այլ ձևակերպումներով էին հանդես գալիս: Սա կարծում եմ` ինչ-որ չափով առաջընթաց է»,- ասաց նա:

Պատգամավորի խոսքով` կառավարությունը, ըստ էության, տվեց դրական եզրակացություն այդ նախագծին: Նա համարում է, որ Հայաստանն այլ ճանապարհ չունի, քան ճանաչել Արցախի Հանրապետությունը: Դրանով նաև կարելի է լուծել լայնածավալ պատերազմի վերսկսումը կանխելու հարցը:

«Եթե ուզում ենք աջակիցներ ու գործընկերներ ունենալ ամբողջ աշխարհում, ապա Արցախի ճանաչումը այլընտրանք չունի: Արցախի ճանաչմամբ` մենք կանխում ենք շատ խնդիրներ, մենք դառնում ենք աշխարհում քաղաքական գործոն, մինչդեռ այս պարագայում մենք շատ թույլ վիճակում ենք գտնվում: Ճանաչումը քաղաքական հայտ է, որի հետ պետք է հաշվի նստի միջազգային հանրությունը»,- ասաց Զարուհի Փոստանջյանը: