Ավտոբուսի պայթյունից տուժած պատանիների գիտակցությունը տեղն է, հղիի վիճակը` բավարար. մանրամասներ

Ավտոբուսից պայթյունից տուժածների բուժումը շարունակվում է: Yerkir.am-ին ՀՀ առողջապահության նախարարությունից տեղեկացրին, որ 14 և 15 տարեկան պատանիների առողջական վիճակը կայուն է, նրանք շարունակում են նախատեսված բուժումը «Սուրբ Աստվածամայր» բժշկական կենտրոնում:

Տղաների գիտակցությունը տեղն է, նրանց գտնվում են բժիշկների մշտական հսկողության ներքո, քանի որ խոր վերքեր ունեն, որոնց դեպքում  առկա է առաջնային ինֆեկցիայի ներթափանցման վտանգ, և բուժօգնությունն այս փուլում ուղղված է վարակների կանխարգելմանը: 

Բացի այդ` «Արմենիա» հանրապետական բժշկական կենտրոնի տարբեր  բաժանմունքներում  բուժում է  ստանում  3 քաղաքացի, որոնց վիճակը բժիշկները գնահատում են լավ: 

53-ամյա Հասմիկ Մելքոնյանին  տեղափոխել են նյարդավիրաբուժության բաժանմունք, իսկ 14-ամյա աղջիկը և  45-ամյա Հարություն Թերզյանը գտնվում են Քիթ-կոկորդ-ականջ հիվանդությունների բաժանմունքում: Երկուսի վիճակն էլ լավ է, բայց պայթյունի հետևանքով նրանք լսողական որոշ խնդիրներ ունեն:

Պայթյունից տուժած հղի կինն իր բուժումը շարունակում է Վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտում: «Նրա առողջական վիճակը գնահատվում է բավարար: Ճիշտ է, պտուղը չի տուժել, բայց հետսթրեսային բարդություններից խուսափելու համար անհրաժեշտ է մշտական հսկողություն" Այս պահի դրությամբ կնոջ և  պտղի կյանքին  վտանգ չի սպառնում»,- հայտնեցին հիվանդանոցից: