Կնոջ կյանքին վտանգ չի սպառնում, պտղի մասին շուտ է ինչ-որ բան ասել. Ռազմիկ Աբրահամյան

Ավտոբուսի պայթյունից տուժած հղի կնոջ` 27-ամյա Անուշ Եղիկյանի վիճակը բավարար է: Այս մասին yerkir.am-ի հետ զրույցում ասաց ՀՀ գլխավոր մանկաբարձ-գինեկոլոգ Ռազմիկ Աբրահամյանը:

Հիշեցնենք, որ երեկ կնոջը «Արմենիա» բուժկենտրոնի վերակենդանացման բաժանմունքից տեղափոխել էին Վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտ:

Աբրահամյանը տեղեկացրեց նաև, որ Անուշի առողջական վիճակում կա դրական տեղաշարժ, քանի որ եթե երեկ նրա առողջական վիճակը բժիշկները գնահատում էին ծանր կայուն, ապա այս պահի դրությամբ` բավարար կայուն:

«Կնոջ կյանքին վտանգ չի սպառնում, պտղի մասին դեռ շուտ է ինչ-որ բան ասել: Հիմա կինը համապատասխան բուժում է ստանում` վիժումը կանխելու համար»,- ասաց Աբրահամյանը: 

Հիշեցնենք, որ Անուշն ունի 6-ամյա աղջիկ, և սա կնոջ երկրորդ երեխան է: Ի դեպ, հայտնի է երեխայի սեռը` տղա է: