Երեխայի կերակրափողն է վնասվել. իրեն և 4-ամյա դստերը սնդիկով թունավորած կնոջ և երեխայի կյանքին վտանգ չի սպառնում

Տեղեկացրել էինք, որ սեպտեմբերի 16-ին՝ ժամը 08-ի սահմաններում, Շ. Թումանյանն իր ննջասենյակում ինքնասպան լինելու համար խմել է սնդիկի հիդրօքսիդ, բացի այդ` ներարկիչի միջոցով սնդիկի հիդրօքսիդ է խմեցրել իր 4-ամյա դստերը։ Դեպքի հետ կապված` ՀՀ քննչական կոմիտեի Արարատի մարզային քննչական վարչության Մասիսի քննչական բաժնում սեպտեմբերի 16-ին հարուցվել է քրեական գործ՝ ՀՀ քրեական օրենսգրքի 34-104-րդ հոդվածի 1-ին մասի հատկանիշներով (սպանության փորձ):

Yerkir.am-ի հետ զրույցում «Մուրացան» համալսարանական հիվանդանոցից բժշկուհի Տիրուհի Չերքեզյանը հայտնեց, որ երեխայի վիճակը կայուն է, նրա կյանքին վտանգ չի սպառնում: «Բավական ակտիվ երեխա է, ուղղակի պետք է լավ բուժում ստանա, քանի որ կերակրափողն ու ստամոքսի լորձաթաղանթն են վնասվել: Երեխայի մոտ են նրա տատիկն ու պապիկը, խելոք մնում է նրանց մոտ: Երեխան հոգեկան որևէ խնդիր չունի: Նա պետք է բժիշկների երկարատև հսկողության տակ մնա, որովհետև սնդիկը մի քիչ ուշ է հեռանում օրգանիզմից»,- ասաց բժշկուհին:

«Արմենիա» բժշկական կենտրոնից էլ տեղեկացրեցին, որ երեխայի մոր` Շուշանիկի վիճակը նույնպես կայուն է, նրա կյանքին վտանգ չի սպառնում: «Սակայն նրա մոտ առկա են ինչ-ինչ հոգեբանական խնդիրներ: Այսօր դեռ մեզ մոտ կմնա, որից հետո կտեղափոխվի համապատասխան հիվանդանոց»,- ասացի մեզ:

Ի դեպ, համաձայն «Արմենիա» բժշկական կենտրոնից ստացված տեղեկանքի՝ Շ.Թումանյանն ի վիճակի չէ բացատրություն տալ: