Արցախում զոհված Վիտյան բռնցքամարտի Հայաստանի պատանիների չեմպիոն էր

Այսօր Գյումրիում կհուղարկավորեն ապրիլյան մարտական գործողությունների ժամանակ ԼՂՀ Մարտակերտի շրջանում զոհված զինծառայող` 20-ամյա Վիկտոր Յուզիխովիչին: Նա բռնցքամարտիկ էր, Գյումրու օլիմպիական հերթափոխի պետական մարզական քոլեջի շրջանավարտ:

Yerkir.am-ի հետ զրույցում քոլեջի տնօրեն Հակոբ Փանոսյանը հայտնեց, որ Վիտյան իրենց քոլեջում 5 տարի է սովորել, եղել է Հայաստանի բռնցքամարտի պատանիների չեմպիոն, փոքր տարիքի պատանիների Եվրոպայի փոխչեմպիոն: «Նորմալ, շնորհքով, համեստ երեխա էր, ծնողները համոզում էին, որ մնար՝ սովորեր, բայց ինքը չէր համաձայնում, ուզում էր շուտ գնար` ծառայեր»,- ասաց նա՝ նշելով, որ Գյումրիում բոլորը սգում են նրա համար:

Հիշեցնենք, որ զինծառայողի հոգեհանգիստը տեղի է ունեցել Գյումրու Սուրբ Նշան եկեղեցում: