Հրազդանում պայքարելու ենք Երևանից հյուրախաղերի եկող քաղաքական գործիչների դեմ. Աշոտյանի ակնարկը՝ Փաշինյանին

Որոշ քաղաքական շրջանակներ փորձում են Հրազդանի քաղաքապետի ընտրությունները ՏԻՄ` լոկալ ընտրություններից վերածել քաղաքականի. այսօր լրագրողներին ասաց ՀՀԿ փոխնախագահ Արմեն Աշոտյանը:

«Մեր թիմը տեղում ակտիվ պայքարում է Երևանից հյուրախաղերի ժամանող քաղաքական գործիչների դեմ: Կարծում եմ` Հրազդանն այն տեղը չի լինելու, որտեղ տարբեր` ոչ հրազդանցի քաղաքական գործիչներ կփորձեն կայացնել սեփական քաղաքական միավորումները: Բոլոր դեպքերում, եթե կարիքը լինի օգնելու մեր թիմին, մենք կօգնենք: Հուսով եմ, որ հրազդանցին ինքնուրույն կկայացնի իր որոշումը` անկախ նրանից, թե որ թեկնածուի օգտին է քվեարկելու»,- ասաց նա` հավելելով, որ Հրազդանն այն քաղաքն է, որտեղ քաղաքացիները շատ լավ իրար գիտեն և շատ լավ գիտեն բոլոր թեկնածուներին:

«Մենք լրացուցիչ քաղաքական PR-ի անհրաժեշտություն չենք տեսնում, բայց մեր թիմին մենակ չենք թողնի: Հրազդանում կան որոշակի խնդիրներ և դրանք հնարավոր է լուծել նախընտրական ծրագրի շրջանակներում»,- եզրափակեց Աշոտյանը:

Հրազդանի քաղաքապետի ընտրությունները կայանալու են ապրիլի 17-ին: Քաղաքապետ դառնալու համար պայքարում է երեք թեկնածու` գործող քաղաքապետ ՀՀԿ-ական Արամ Դանիելյանը, «Քաղաքացիական պայմանագիր»-ի անդամ Սասուն Միքայելյանը և ՕԵԿ-ական Արթուր Միսակյանը: Ի դեպ, Սասուն Միքայելյանի նախընտրական շտաբի ղեկավարը ՀԱԿ խմբակցության պատգամավոր, ՔՊ անդամ Նիկոլ Փաշինյանն է: