Դավիթ Լոքյանն ընդունել է IDeA հիմնադրամի ներկայացուցիչներին

ՀՀ տարածքային կառավարման և զարգացման նախարար Դավիթ Լոքյանն այսօր ընդունել է «Հայաստանի զարգացման նախաձեռնություններ» (IDeA) հիմնադրամի գլխավոր գործադիր տնօրեն Էդգար Մանուկյանին և Արցախի ծրագրի ղեկավար Սուրեն Ամիրբեկյանին:

Ողջունելով հյուրերին` նախարարը հետաքրքրվել է հիմնադրամի կողմից իրականացված նախագծերով: Հիմնադրամի գլխավոր գործադիր տնօրենը նախարարին ներկայացրել է 2014թ. աշխարհի տարբեր երկրներից ժամանած աշակերտների առջև իր դռները բացած UWC Դիլիջան քոլեջի ընթացիկ ծրագրերի ու ձեռքբերումների վերաբերյալ և նշել, որ «UWC Դիլիջան քոլեջի հիմնումը խթան է հանդիսացել Դիլիջան քաղաքի զարգացման նոր նախաձեռնությունների համար, որի շրջանակներում էլ մեկնարկեց Դիլիջանի զարգացման ծրագիրը: Նախարարին ներկայացվել են ծրագրի հիմնական ուղղությունները և նպատակը, այն է` քաղաքը մշակութային, կրթական եւ առողջարանային կարեւոր հանգույց դարձնելը։

Հանդիպման ընթացքում անդրադարձ է եղել նաև «Տաթևի վերածնունդ» նախագծին` իր բաղադրիչներով, և այլ ենթակառուցվածքային ծրագրերի, որոնք հիմնադրամն իրականացնում է երկրի տարածքում: