Վթարի ենթարկված մեքենայում 3 զինծառայող եղբայրներ են եղել. մանրամասներ

Երևան-Մեղրի ավտոճանապարհին մարտի 9-ին ուշ երեկոյան վթարի ենթարկված պայմանագրային զինծառայողներ Ռուսլան, Ռոման և Արկադի Հարությունյանները եղբայրներ են: 30-ամյա Ռուսլանը հոսպիտալացման ճանապարհին մահացել է, իսկ Ռոմանն ու Արկադին այս պահին գտնվում են ՀՀ ՊՆ կենտրոնական կլինիկական զինվորական հոսպիտալում է, նրանց վիճակը ծանր է: Այս մասին Yerkir.am-ի հետ զրույցում հայտնեց տղաների համագյուղացի` Սիսի գյուղապետ Արմեն Եղյանը:

«Տուն գալու ճանապարհին է դեպքը տեղի ունեցել: Տղաները  պայմանագրային զինծառայող են արդեն մոտավորապես չորս տարի: Երկու եղբայրներին ծանր վիճակով տեղափոխել են հիվանդանոց, իսկ Ռուսլանը մահացել է: Վատ պայմաններում ապրող մարդիկ են: Երեք եղբայր են, հայր ու մայր»,- ասաց նա:

ՀՀ ՊՆ կենտրոնական կլինիկական զինվորական հոսպիտալից տեղեկացանք, որ տղաների վիճակը ծանր է, գտնվում են վերակենդանացման բաժանմունքում: