Գաբալայից շուրջ 25 ադրբեջանցի սպիտակ դրոշներով փորձել է հատել հայկական սահմանը

Ադրբեջանի Գաբալայի շրջանի Քյոթուքլու շրջանի շուրջ 25 բնակիչ այսօր գիշերը  փորձել է  անցնել Լեռնային Ղարաբաղի Հանրապետություն՝ Ակնայի (Աղդամ) ուղղությամբ, հայտնում է ադրբեջանական minval.az-ը: 

Նրանք սպիտակ դրոշներով մոտեցել են շփման գծին, սակայն նրանց շրջապատել են ադրբեջանցի իրավապահները:

Ադրբեջանական լրատվամիջոցը նշում է, որ պատճառը տեղի իշխանություններն են, ավելի կոնկրետ` Նաբիեւների գերդաստանը: Գյուղացիները հայտնել են, որ Նաբիեւները հանիրավի մեղադրում են գյուղի մի շարք երիտասարդների ու բռնել  են  տվել նրանց: Ադրբեջանի հարկային նախարարի խորհրդական  Գարա Նաբիեւը եւ նրա ազգական Իքրամ Նաբիեւը  վերահսկողության տակ են առել ողջ շրջանը: Նրանք թմրանյութեր են գցում բնակիչների տները, ապա կանչում ոստիկաններին: 

Սահմանն անցնել փորձող բնակիչներն այժմ Ակնայի  ոստիկանական բաժանմունքում են: