Եթե ՀՀԿ-ն ԲՀԿ-ին համագործակցության առաջարկություն անի, կքննարկեն

Այսօր խորհրդարանական ճեպազրույցների ժամանակ լրագրողները ԲՀԿ խմբակցության պատգամավոր Վահե Էնֆիաջյանից հետաքրքրվեցին ԲՀԿ-ում տիրող ներքին խմորումների մասին:

Հիշեցնենք, որ ԲՀԿ ներքին խմորումների պատճառը ՀՀԿ-ի հետ կոալիցիա կազմել-չկազմելն է (ԲՀԿ արդեն նախկին խոսնակ Վահան Բաբայանը հենց այդ պատճառով հրաժարական տվեց. նա կողմ էր կոալիցիային), եւ սա այն դեպքում, երբ ՀՀԿ-ից կոալիցիայի առաջարկություն ԲՀԿ-ին չի արվել:

Վահե Էնֆիաջյանը նախ ասաց, որ չի ցանկանում անձնավորված մեկնաբանել ամեն ինչ, և որ լինում են ԲՀԿ անդամներ, որոնց կարծիքները կարող են ներդաշնակ չլինել ԲՀԿ ընդհանուր մոտեցումների հետ, և որ նման մարդկանց կողմից արտահայտված կարծիքները ընդունվում են որպես անձնական կարծիք:

«Մենք համարում ենք, որ Վահան Բաբայանը մեր գործընկերն է, մեր ակտիվ պատգամավորներից է: Նա ոչ թե շեղվել է ԲՀԿ միասնական կարծիքից, այլ անձնական կարծիք է հայտնել: Ներքին խոհանոցային աշխատանքներին պարբերաբար անդրադառնալ տեղին չեմ համարում»,- ասաց նա:

Լրագրողները հարցրեցին նաև, թե ի՞նչ կարծիք ունի ԲՀԿ-ական պատգամավորը ՀՀԿ-ՀՅԴ քաղաքական համագործակցության մասին: Պատգամավորը նշեց, որ հաջողություն է ցանկանում, և թե որքանո՞վ կկատարվեն այդ հուշագրի կետերը, ցույց կտա ժամանակը:

Հարցին, թե արդյո՞ք կա առաջարկ ՀՀԿ կողմից` համագործակցելու, և եթե լինի առաջարկ, կընդունե՞ն, նա պատասխանեց, որ տարաբնույթ կարծիքներ հնչել են` իշխանությունների կողմից առաջարկությունների հետ կապված, և եթե պաշտոնական առաջարկություն լինի, ԲՀԿ-ն կքննարկի այդ հարցը և հայտարարությամբ հանդես կգա: