Սեդրակյանի արարքը դատապարտում է, բայց նրա դեմ կազմակերպված ակցիային չի մասնակցի

ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահ Էլինար Վարդանյանը դատապարտում է ՀՀԿ-ական պատգամավոր Մհեր Սեդրակյանի` լրագրողների նկատմամբ անհարգալից վերաբերմունքը:

«Լրագրողները հանդիսանում են հասարակության, նաև իշխանությունների, իշխանության ներկայացուցիչների միջև կապող օղակը, հետևաբար` այդ հարաբերությունները պետք է հիմնված և խարսխված լինեն միայն փոխադարձ հարգանքի վրա»,- լրագրողներին ասաց նա:

Դիտարկմանը, թե Էթիկայի հանձնաժողովն ընդամենը արձանագրում է պատգամավորների թույլ տված խախտումները ու այդքանով սահմանափակվում, Վարդանյանն արձագանքեց. «Իրականում խնդիրն այն է, որ որևէ այլ պատասխանատվության միջոց կիրառել, թերևս, հնարավոր չէ իրավական կարգավորումների շրջանակներում: Ինչ վերաբերում է նախկինում նման դեպքերի հանգամանքին, ես ևս մեկ անգամ պետք է շեշտեմ, որ նման դեպքերը բազմիցս իմ կողմից ենթարկվել են դատապարտման խոսքերի, իսկ պատասխանատվության միջոցներ կիրառելու լիազորություն այսօր մեր իրավական համակարգին չի տրված»,- ասաց պատգամավորը՝ հավելելով, որ լրագրողների վաղվա ակցիային չի մասնակցի, քանի որ այդ ակցիան լինելու է զուտ լրագրողական, և ճիշտ կլինի, որ հենց լրագրողները մասնակցեն այդ միջոցառմանը: Իսկ Մհեր Սեդրակյանի վարքագիծը դատապարտելու մասին հայտարարությանը ծանոթանալուց հետո միայն կարող է ասել` կստորագրի՞ այն, թե՞ ոչ: