Ապաքաղաքական մարդ է. Արման Թաթոյանը` ԱԺ-ում

ԱԺ հերթական քառօրյայում քննարկվում է ՄԻՊ ընտրելու հարցը: ԱԺ պետաիրավական հարցերի հանձնաժողովի որոշմամբ` ՄԻՊ թեկնածու է առաջադրվել Արման Թաթոյանը:

Հիմնական զեկուցող` պետաիրավական հարցերի հանձնաժողովի նախագահ Հովհաննես Սահակյանը նախ ներկայացրեց թեկնածուի կենսագրությունը, ապա հավելեց, որ թեկնածուն` Արման Թաթոյանը, իր գործունեության ընթացքում իրեն դրսեւորել է որպես ապաքաղաքական անձնավորություն, ով միշտ այս կամ այն հարցի վերաբերյալ հայտնել է մասնագիտական տեսակետ: «Երիտասարդ է, պրակտիկ, եւ կարծում եմ` այն խնդիրները, որոնք դրված են ՄԻՊ-ի առջեւ, Արման Թաթոյանը կարող է դրանք լուծել, իհարկե` բոլորիս աջակցությամբ»,- ասաց նա:

Ելույթ ունեցավ նաեւ Արման Թաթոյանը:

«Ժառանգություն» խմբակցության պատգամավոր Թեւան Պողոսյանը հարց ուղղեց նրան, թե որո՞նք են այն բացթողումները, որ ՄԻՊ-ը թույլ է տվել: Արման Թաթոյանը նշեց, որ ՄԻՊ ինստիտուտը թեեւ ունի կայացման ճանապարհ, բայց վստահորեն գնում է այդ ճանապարհով: Ինչ վերաբերում է բացթողումներին, նա մատնանշեց «ՄԻՊ-ի մասին» օրենքում փոփոխություններ անելու անհրաժեշտությունը, ՀԿ-ների առավել ակտիվ ընդգրկումը ՄԻՊ դաշտում: «Առաջնահերթ անելիք, որը օբյեկտիվ կամ սուբյեկտիվ պատճառներով չի ստացվել, դա ՄԻՊ-ի մասին օրենսդրական փոփոխությունների հարցն է, որը մեծապես կնպաստի ՄԻՊ-ի հեղինակության բարձրացմանը»,- ասաց Արամ Թաթոյանը:

Թեւան Պողոսյանը հարցրեց, թե արդյո՞ք օրենսդրական բացն է միակ բացթողումը: Արման Թաթոյանը պատասխանեց, որ օրենսդրական բացթողման արդյունքում, նաեւ` պրակտիկ առումով, ցավոք, դեռ չկա այն ընկալումը, որ պետք է ակտիվորեն աշխատել ՄԻՊ ինստիտուտի հետ: