Ավանի դատարանի նախագահը հրաժարականի դիմում է ներկայացրել

Երևան քաղաքի Ավան և Նոր Նորք վարչական շրջանների ընդհանուր իրավասության առաջին ատյանի դատարանի նախագահ Սամվել Ուզունյանը դիմում է ներկայացրել Արդարադատության խորհրդին դատարանի նախագահի պաշտոնից հրաժարվելու մասին` նույն դատարանի դատավորի պաշտոնում պաշտոնավարելու մտադրությամբ: Այս տեղեկությունը yerkir.am-ի հետ զրույցում հաստատեցին դատական դեպարտամենտից:

Նշենք նաև, որ ՀՀ վճռաբեկ դատարանի նախագահը հիշյալ դատարանի նախագահի պաշտոնի թափուր տեղի համար հայտարարել է մրցույթ: Հաշվի առնելով այն հանգամանքը, որ, ՀՀ դատական օրենսգրքի 125-րդ հոդվածի 2-րդ մասի համաձայն, միայն նույն դատարանի դատավորները կարող են հայտով դիմել Արդարադատության խորհրդին, ուստի միայն Երևան քաղաքի Ավան և Նոր Նորք վարչական շրջանների ընդհանուր իրավասության առաջին ատյանի դատարանի դատավորները հայտարարության հրապարակումից հետո` մինչև սույն թվականի փետրվարի 12-ը (երկշաբաթյա ժամկետում) կարող են հայտով դիմել Արդարադատության խորհրդին: