Գրեթե վերացել էր բանակում դիպուկահարից խոցվելու հավանականությունը, բայց... Արծրուն Հովհաննիսյան

Թող ոչ մեկին չթվա, թե պաշտպանության նախարարությունը հակառակորդի ակտիվությամբ փորձում է սրբագրել իր թերությունները, սխալները, նման բան չկա և չի կարող լինել. այսօր՝ «Մեդիա կենտրոն»-ում քննարկման ժամանակ, հայտարարեց ՀՀ պաշտպանության նախարարի խոսնակ Արծրուն Հովհաննիսյանը՝ խոսելով 2015-ին բանակում արձանագրված` զինծառայողների մահվան դեպքերի մասին:

«Այո, նախորդ տարի բանակում արձանագրված 57 մահերն էլ այս կամ այն կերպ հակառակորդի գործողությունների հետևանք են, բայց ասել, որ սա է իրավիճակը, ամեն ինչ արդարացված է, չի կարելի: Չկա մի զինվորական, որ մտածի կամ ասի, որ այս մահերն արդարացված են, իհարկե` ոչ»,- ասաց նա և հավելեց, որ ծառայության հետ անմիջական կապ ունեցող մահվան դեպքերի թվերը սխալ է ընդհանրացնել և հակառակորդի գործողությունների ժամանակ զոհված զինծառայողների թվի հետ ներկայացնել:

Նշենք, որ 2013-ին բանակում զինծառայողների մահվան դեպքերը համեմատաբար քիչ են եղել, քան դրան հաջորդած 2 տարիներին:

«Պաշտպանության նախարարության գործունեության շնորհիվ` վերջին երկու տարիներին միջանձնային հարաբերություններով պայմանավորված դեպքերը չեն ավելացել, աճել է հակառակորդի գործողությունների հետևանքով զոհերի թիվը»,- ասաց Հովհաննիսյանը և նշեց, որ նվազել են նաև դիպուկահարի կրակոցից մահվան դեպքերը:

«Կարելի է զինվորի համար այնպիսի բլինդաժ, այնպիսի կրակադիրք ստեղծել, որով գրեթե կարելի է վերացնել դիպուկահարից խոցվելու հավանականությունը, ինչին մենք գրեթե հասել էինք 2014-ին, սակայն հաջորդ տարի հակառակորդը հրետանի կիրառեց, և ստացվում է, որ դիպուկահարի կրակոցից զինվորների չզոհվելու` ամբողջ տարվա կատարած աշխատանքը ոչինչ չի տալիս»,- ասաց պաշտպանության նախարարի մամուլի քարտուղարը: