Դպրոցների ու մանկապարտեզների գործունեությունը կհետաձգվի ևս մեկ շաբաթով

Կառավարության այսօրվա նիստի օրակարգին անցնելուց առաջ վարչապետ Հովիկ Աբրահամյանը առողջապահության նախարար Արմեն Մուրադյանին խնդրեց ներկայացնել երկրում սուր շնչառական հիվանդությունների վիճակագրությունը:

Նախարարը զեկուցեց, որ այս օրերին սուր շնչառական հիվանդությունների զգալի աճ է նկատվում: «Այս պահին սուր շնչառական հիվանդություններով հիվանդանոցներում բուժվում է 948 հիվանդ, կա  թոքաբորբով 420 հիվանդ: 114 հղի գտնվում է հսկողության ներքո, որոնցից 38-ը թոքաբորբով հղիներ են: Սուր շնչառական հիվանդություններով հոսպիտալացվածներից 796-ը երեխաներ են: Հարյուրավոր հիվանդներ բուժվել են և վերադարձել տուն»,- ասաց նախարարը:

Նա ցավով արձանագրեց, որ եղել են մահվան դեպքեր, որոնցից երեքը գնացվել է նախորդ տարվա վերջին, իսկ ութը այս տարեսկզբին:

Հաշվի առնելով ստեղծված իրավիճակը` Արմեն Մուրադյանը կրթության և գիտության նախարարին առաջարկեց մեկ շաբաթով ևս հետաձգել դպրոցների և մանկապարտեզների գործունեությունը:

Վարչապետը կրթության և գիտության նախարարին հանձնարարեց կարգավորել այդ հարցը: