Բնապահպանության նախարարի համար զարմանալի է գառնեցիների բողոքը

Այսօր` բնապահպանության նախարար Արամայիս Գրիգորյանի ամփոփիչ ասուլիսի ժամանակ, լրագրողները հարց ուղղեցին երկու օր առաջ` դեկտեմբերի 21-ին, մի խումբ գառնեցիների բողոքի և նրանց կողմից ճանապարհը փակելու վերաբերյալ: Հիշեցնենք, որ գառնեցիները բողոքում են, որ իրենց ոռոգման ջուրն ուղղվել է այլ համայնքներ:

Նախարարը նշեց, որ իր համար զարմանալի է գյուղացիների բողոքը, որովհետև ժամանակին այդ հարցի կապակցությամբ լսումներ են եղել,  մասնավորապես` երկու լսում է կազմակերպվել, որից մեկը իրականացրել է համայնքը, իսկ մյուսը` բնապահպանության նախարարությունը:

«Լսումների ժամանակ մենք բացասական երևույթ չենք նկատել, համայնքի կողմից ունենք դրական եզրակացություն, որ իրենք համաձայն են, որ այդ տարածքից ջուրը տեղափոխվի համապատասխան վայր, և` օրինական: Մենք տվել ենք մեր թույլտվությունը: Ինձ համար զարմանալի է, թե ինչու են գյուղացիները հիմա ահազանգում: Մենք չենք տեսնում բացասական իրավիճակ, որ ջուրը չի բավարարի»,- ասաց Գրիգորյանը:

 Լրագրողները հարցրեցին, թե ինչպե՞ս է լինում, որ դրական արդյունքը հանրային լսումներից հետո վերաճում է հանրային բողոքի, երբ գյուղը ոտքի է կանգնում, նախարարը կրկնեց, որ կազմակերպված լսումներին մասնակցել է ամբողջ համայնքը:

«Մենք շարժվում ենք օրենքով, իրավունք չունեն ասելու` մի մասը դրան դեմ է, ուրեմն որոշումը չկայացնենք»,- ասաց Արամայիս Գրիգորյանը: