''Չարություն անելու'' մասին` բնապահպանության նախարարի հարցը հռետորական է եղել

Բնապահպանության նախարար Արամ Հարությունյանը չի համարում, որ նախօրեին ԱԺ-ում պատգամավորներն իրեն ճնշել են: Ըստ նրա` դրանք աշխատանքային հարաբերություններ են, ինքը շարունակում է շատ լավ աշխատանքային հարաբերությունները պատգամավորների հետ:

Հիշեցնենք¸ որ երկու օր առաջ «Բնապահպանական և բնօգտագործման վճարների մասին» օրենքում փոփոխություններ կատարելու մասին նախագծի բուռն քննարկման եզրափակիչ փուլում պատգամավորներ Էդմոն Մարուքյանն ու Արփինե Հովհաննիսյանն իրենց ելույթներում կոչ արեցին նախարարին` պատասխանել իրենց հարցերին,  այլ ոչ թե ասել,  թե ով ինչ հարց տալու իրավունք ունի: Նախարարը պատասխանել էր. «Ասում եք՝ մեր տուն ես եկել, քեզ խելոք պահի: Բայց ի՞նչ եմ արել, չարություն եմ արե՞լ»:

Yerkir.am-ի հետ զրույցում նա նշեց, որ ընթանում էր նորմալ աշխատանքային պրոցես: Ինչ վերաբերում է «չարություն անելուն», ասաց, որ իր հարցն ավելի շատ հռետորական էր, և ինքը փորձել է պարզաբանում տալ: Նախարարի խոսքով` ամեն ինչ նորմալ է, և դրա վառ ապացույցը օրենքի առաջին և երկրորդ ընթերցումներն էին, որոնցով նախաձեռնությունն ընդունվեց:

«Ես անկեղծորեն խոստովանեցի ու ասացի, որ ես ոչ մի նպատակ չեմ ունեցել որևէ մեկին կշտամբելու, նեղացնելու: Միգուցե ներկայացնելու կամ խոսելու ձևն էր պատճառը, ինչևէ,  յուրաքանչյուր մարդ իր մոտեցումն ունի,  չեն կարող բոլորը միանման մտածել: Բայց դա բացարձակ նստվածք չի տվել, ես նեղացած չեմ»,- ասաց նախարարը:

Հարցին` ինչպե՞ս կմեկնաբանի Էդմոն Մարուքյանի դիտողությունը,  թե` «Դուք ձեր տանը չեք, ուստի պահպանեք ԱԺ կանոնակարգ- օրենքը»,  նախարարը պատասխանեց.  «Սա Ազգային ժողով է,  սա որևիցե մեկի սեփականությունը չի»: