Մարտակերտում զոհված Գոռը ռազմական ինստիտուտի սան էր

Արդեն հայտնել ենք, որ դեկտեմբերի 17-ին՝ ժամը 21:30-ի սահմաններում, ՊԲ հյուսիսային ուղղությամբ տեղակայված զորամասերից մեկի պահպանության տեղամասում, դեռևս չպարզված հանգամանքներում, մահացու վիրավորում է ստացել ՊԲ պայմանագրային զինծառայող` 1992թ. ծնված Գոռ Վահանի Օհանյանը:

Yerkir.am-ի տեղեկություններով՝ նա Արարատի մարզի Փոքր Վեդի գյուղից է, ընտանիքի ավագ որդին: Գոռը 2012-ին ավարտել էր Վազգեն Սարգսյանի անվան ռազմական ուսումնարանն ու ծառայության անցել ԼՂՀ Մարտակերտի շրջանում:

Yerkir.am-ի հետ զրույցում Փոքր Վեդու գյուղապետ Նորիկ Մարտիրոսյանը հայտնեց, որ Գոռն իրենից փոքր՝ դպրոցական եղբայր ունի, իսկ քույրը ուսանող է: Նա հայտնեց, որ Գոռի մայրն էլ իրենց գյուղում մանկավարժ է:

Դեռևս հայտնի չեն զինծառայողի մահվան հանգամանքները: Դեպքի մանրամասները պարզելու համար կատարվում է քննություն: