ԿԸՀ-ն պարտավոր է պաշտոնական պատասխան տալ բոլոր բողոքներին. Ստեփան Մարգարյան

ԱԺ պատգամավոր Ստեփան Մարգարյանն այսօր խորհրդարանում անդրադարձավ սահմանադրական փոփոխությունների հանրաքվեին:

Նա լրագրողների հետ զրույցում նշեց, որ Սահմանադրությունը մեր վաղվա օրն է, մեր վաղվա կյանքն է, ուստի իրապես կարևոր է դրա` արդար ճանապարհով ընդունվելը: Մարգարյանը նշեց, որ սոցիալական ցանցերում և, առհասարակ, համացանցում հայտնված այն հոլովակները, բողոքները, որոնք ցույց են տալիս, որ որոշակի ընտրախախտումներ են եղել հանրաքվեի ընթացքում, պետք է արժանանան իշխանությունների և ԿԸՀ-ի համապատասխան արձագանքին:

Ըստ պատգամավորի`պետք է լինեն լուրջ և հիմնավոր բացատրություններ: Նա նշեց նաև` ԿԸՀ-ն է, որ պետք է կայացած համարի հանրաքվեի արդյունքները, մինչդեռ` այդ կառույցը վերջնական պատասխան չի տվել:

«ԿԸՀ-ն պարզապես պարտավոր է պաշտոնական պատասխան տալ բոլոր դիմումներին, բողոքներին, տեսանյութերին, որոնք տեղադրված են սոցիալական ցանցերում: Դրանից հետո նոր կարելի է գնահատական տալ»,- ասաց Մարգարյանը: