Գործադիր իշխանությանն անվստահություն հայտնելու հնարավորություն է առաջանում. Արծվիկ Մինասյան

Թալինում սահմանադրական հանրաքվեի քարոզարշավի շրջանակներում ՀՅԴ անդամ, ԱԺ ՀՅԴ խմբակցության պատգամավոր Արծվիկ Մինասյանը ներկայացրեց գործադիր իշխանության այն կարևոր մեխանիզմները, որոնք նախատեսված են սահմանադրական փոփոխություններով: Նրա խոսքով` եթե գործադիր իշխանությունը չկրեց պատասխանատվություն և հաշվետու չեղավ, ապա իմաստ չունի խոսել նման գործադիր իշխանության արդյունավետ գործունեության մասին:

 «Այսօր ունենք գործադիր իշխանություն, որը ձևավորում է նախագահը` հաշվի առնելով պառլամենտում քաղաքական մեծամասնությունը: Եվ եթե նախագահն ու քաղաքական մեծամասնությունը մեկ ուժից են, դա նշանակում է, որ գործադիրն էլ է նույն ուժին պատկանում, այսինքն` ստեղծվում է անպատասխանատու համակարգ: Այսօրվա կառավարությանը անվստահություն ներկայացնելու մեխանիզմ չկա, գործող Սահմանադրությունը դրա հնարավորությունը չի տալիս: Մինչդեռ` սահմանադրական փոփոխություններով` տարին առնվազն մեկ անգամ կառավարությունը, վարչապետի գլխավորությամբ, հաշվետվություն պետք է ներկայացնի խորհրդարանին ծրագրի կատարման վերաբերյալ: Խորհրդարանը կարող է անվստահություն հայտնել թե\' վարչապետին, թե\' կառավարությանը` ամբողջությամբ, թե\' նախարարներին` առանձին: Այսօր չունենք այդ հնարավորությունը, միայն ամբողջ կառավարությանը կարող ես անվստահություն հայտնել: Եվ եթե որևէ նախարար սխալ կամ անարդյունավետ է գործում, ապա գործող մեխանիզմը թույլ չի տալիս, որ կարողանաս խորհրդարանում հարցը դնել ու այդ նախարարին պաշտոնանկ անել»,- բացատրեց Արծվիկ Մինասյանը: