Քաղաքաշինության նախարարությունը որոշել է ազատվել շինարարական օբյեկտների պատվիրատու լինելու խնդրից

Այսօր ԱԺ-ում շարունակվում են 2016թ. բյուջեի քնարկումները:

Քաղաքաշինության մասով զեկուցեց քաղաքաշինության նախարար Նարեկ Սարգսյանը: Նա նշեց, որ քաղաքաշինության նախարարության հիմնական սկզբունքները լինելու են՝ տարածքային համաչափ զարգացում, սահմանամերձ համայնքների զարգացմանն ուղղված ծրագրեր ու շինարարության ժամկետների չձգձգում: Նախարարի խոսքով՝ այս գերակայությունների հիման վրա է ձևավորվել բյուջեի ծախսային մասը, որը կազմում է 6 միլիարդ 415 միլիոն դրամ:

Անդրադառնալով շինարարական օբյեկտների կառուցման ժամկետներին՝ Նարեկ Սարգսյանն ասաց, թե նախարարությունը փորձում է անել առավելագույնը՝ ավարտելու համար շինարարական աշխատանքները նշված ժամկետներում՝ 2-3 տարի ժամկետում:

«Օբյեկտների ավարտվածությունը 2012-ին, օրինակ, կազմել է նախատեսված աշխատանքների 24 տոկոսը, 2014-ին՝ 28 տոկոսը, 2015-ին՝ 48 տոկոսը, իսկ 2016-ին նախատեսում ենք ավարտել 58 տոկոսը»,- նշեց նախարարը:

Նարեկ Սարգսյանը շեշտեց նաև, որ քաղաքաշինության նախարարությունը նախաձեռնում է ազատվել շինարարական օբյեկտների պատվիրատու լինելու խնդրից: «Նախարարությունը պետք է լինի հիմնական վերահսկողը, մենք չենք կարող լինել որոշակի օբյեկտների պատվիրատու: Այս ուղղությամբ ևս աշխատանքներ տանում ենք»,- ասաց նա:

Սարգսյանը հավելեց, որ համայնքների համաչափ զարգացման համար իրենք պետական բյուջեի հատկացված գումարները բաշխել են համաչափ: