Կարեն Անդրեասյանը հանդիպել է «Վարդաշեն» ՔԿՀ-ում հացադուլ հայտարարած դատապարտյալների հետ

Այսօր ՀՀ արդարադատության նախարարության «Վարդաշեն» քրեակատարողական հիմնարկում հացադուլ հայտարարած 8 դատապարտյալներին է այցելել ՀՀ մարդու իրավունքների պաշտպան Կարեն Անդրեասյանը: Այս մասին yerkir.am-ին հայտնեց օմբուդսմենի մամլո խոսնակ Շուշանիկ Դանիելյանը:

Նշենք, որ օրեր առաջ էլ հիշյալ ՔԿՀ-ում հացադուլի մեջ գտնվող պահեստազորի գնդապետ Վոլոդյա Ավետիսյանին էր այցելել ՄԻՊ տեղակալ Երանուհի Թումանյանը: Ավետիսյանը հայտնել էր, որ հացադուլը դադարեցնելու մտադրություն չունի: Yerkir.am-ին քրեակատարողական վարչությունից էլ հայտնեցին, որ հացադուլ հայտարարած դատապարտյալների առողջական վիճակը նորմալ է:

Նշենք, որ Վոլոդյա Ավետիսյանն այդ քայլով բողոքում է պայմանական վաղաժամկետ ազատ արձակման խնդրից, բացի այդ՝ պահանջում է նաեւ հանդիպում կազմակերպել արդարադատության նախարար Արփինե Հովհաննիսյանի եւ  լրագրողների հետ: