Ռուսական կործանված օդանավի ուղևորներից ոչ ոք չի փրկվել

Եգիպտոսի իշխանությունների ներկայացուցիչները հայտնել են, որ ռուսական ինքնաթիռի աղետից փրկվածներ չկան: Նշենք, որ ժամեր առաջ ռուսական լրատվամիջոցները՝ հղում կատարելով եգիպտական փրկարար ծառայության աղբյուներին, հայտնել էին, որ փրկարարները կենդանի մնացածների ձայներ են լսել:

Օդանավում բացի Ռուսաստանի դաշնության քաղաքացիներից  եղել են նաև Ուկրաինայի երեք քաղաքացիներ, հնարավոր է նաև լինեն քաղաքացիներ Բելառուսից: Ավելի վաղ ՀՀ ԱԳՆ-ն հայտնել էր, որ կործանված օդանավում ՀՀ քաղաքացիներ չեն եղել:  Ավիաաղետի զոհ է դարձել միայն ՌԴ քաղաքացի ազգությամբ հայ 40-ամյա Լեոնիդ Մնացականովը:

Ինչպես հայտնում է «Ինտերֆաքս»-ը՝ Եգիպտոսի ավիացիոն միջադեպերի հետաքննության հանձնաժողովի ներկայացուցչի խոսքով՝  օդաչուն վթարից առաջ տեխնիկական անսարքության պատճառով արտակարգ վայրէջքի թույլտվություն է խնդրել Էլ Արիշ քաղաքի օդանավակայանում: Օդաչուն դիսպետչերներին նախազգուշացրել է, որ օդանավում տեխնիկական խնդիր է առաջացել, եւ ինքը պետք է հնարավորինս արագ վայրէջք կատարի: Օդանավը գետնին բախվելուց առաջ վայրէջք է կատարել րոպեում 2 կմ արագությամբ:

Ավելի վաղ հայտնել էինք, որ Եգիպտոսի Սինայի թերակղզու կենտրոնական մասում կործանվել է ռուսական քաղաքացիական ինքնաթիռ։  Օդանավում եղել է 224 մարդ, այդ թվում՝ 17 երեխա: