Ընդդիմադիրը դաժան ծեծի է ենթարկվել բանտում Ալիևից ներում չխնդրելու համար

Ադրբեջանական «Ռեալ» շարժման առաջնորդ Իլգար Մամեդովին դաժան ծեծի են ենթարկել թիվ 2 կալանավայրում, որտեղ նա կրում է իր պատիժը։ Այդ մասին հայտնել է նրա փաստաբան Ջավադ Ջավադովը. հայտնում է contact.az-ը:

Հանդիպման ընթացքում փաստաբանը տեսել է Մամեդովի գլխի և պարանոցի կապտուկները: Իր բողոքում փաստաբանը պահանջել է անմիջապես քննել Մամեդովին ծեծի ենթարկելու փաստն ու ապահովել նրա անվտանգությունը։ Ընդդիմադիրին ճնշելու հիմնական պատճառը կարող է լինել այն, որ նա պետության ղեկավարին դիմում չի գրել՝ իրեն ներում շնորհելու խնդրանքով։

Ադրբեջանական կայքը նշում է, որ միջազգային հանրությունը վաղուց  պահանջում է ազատ արձակել նրան, սակայն իշխանություններն անտեսում են այդ պահանջները՝ փորձելով Մամեդովին ստիպել ներում խնդրել:

Իլգար Մամեդովը 7 տարով  կալանավորվել էր 2014-ին` 2013-ին Իսմայիլիի անկարգությունների կազմակերպման մեղադրանքով: