«Մեդեա» հունական ողբերգության բեմականացումը` հայկական ժողգործիքներով

Հոկտեմբերի 5-ին Հրաչյա Ղափլանյանի անվան դրամատիկական թատրոնում տեղի կունենա Եվրիպիդեսի «Մեդեա» ստեղծագործության հիման վրա համանուն ներկայացման պրեմիերան: Ներկայացման բեմադրիչը Գրիգոր Խաչատրյանն է:

Yerkir.am-ի հետ զրույցում դհոլահար Անահիտ Մխիթարյանը նշեց, որ ներկայացման մեջ իրենց ավանդն ունեն ինքն ու դուդուկահար քույրը` Աննա Մխիթարյանը:

«Հայկական իրականության մեջ առաջին անգամ ներկայացմանը ժողգործիքներ կնվագակցեն, ճիշտ է` հայկական ներկայացում չէ, բայց գեղեցիկ են հնչում մեր գործիքները: Երբեք չէի պատկերացնում, որ կարող ենք ներկայացման մեջ հանդես գալ, մի քիչ խորթ էր ու դժվար, բայց արդյունքը շատ հետաքրքիր է ստացվել: Ես նվագում եմ դհոլ ու էլի հարվածային գործիքներ, իսկ Աննան` դուդուկ, զուռնա, թավ շվի»,- ասաց Անահիտ Մխիթարյանը:

Ներկայացման պարուսույցն Արիկ Ասատուրյանն է: Ներկայացման մեջ հանդես կգան Էմմա Մկրտչյանը, Մարիամ Ղազարյանը, Քրիստինե Եղոյանը, Լիդա Լևոնյանը, Անահիտ Կարապետյանը, Լիդիա Գրիգորյանը, Նարեկ Մարտիրոսյանը և Տիգրան Մկրտչյանը:

Ողբերգությունը բաժանված է վեց մասի և խոսքի, պարի ու պլաստիկայի միջոցով վեց դերասանուհի ներկայացնում են կնոջ ապրումներն ու արարքները: Ներկայացումն ուղեկցվում է կենդանի երաժշտությամբ` հայկական էթնո գործիքներով:

Ի դեպ, ներկայացումը կցուցադրվի «ՀայՖեստ» միջազգային թատերական փառատոնի շրջանակներում: