Զինակոչիկների իրավունքների խախտման դեպքերն ավելացել են

2014-ի ձմեռային և 2015-ի ամառային զորակոչերի ընթացքում զինակոչիկների իրավունքների խախտման դեպքերով Հելսինկյան քաղաքացիական ասամբլեայի Վանաձորի գրասենյակ դիմած անձանց թիվը նախորդ՝ 2013-2014 զորակոչերի համեմատ, կրկնակի աճել է: Այս մասին այսօր «Մեդիա կենտրոն»-ում քննարկման ժամանակ հայտարարեց Հելսինկյան քաղաքացիական ասամբլեայի Վանաձորի գրասենյակի խաղաղասիրական ծրագրերի համակարգող Արմինե Սադիկյանը:

Ըստ նրա` եթե նախորդ տարվա զորակոչին իրենց դիմել էին 26 անձի խնդրով, ապա այս անգամ` 45, որոնցից 35-ինը վերաբերել է ոչ պատշաճ բժշկական զննության ենթարկվելուն: Սադիկյանի խոսքով՝ մի կողմից նման աճը պայմանավորված է քաղաքացիների իրազեկվածության բարձրացմամբ, մյուս կողմից` բժշկական զննության հետ կապված հարցերը չլուծելու հետ:

«Շարունակվում են զորակոչվել առողջական լուրջ խնդիրների առկայությամբ անձինք»,- ասաց նա և հավելեց, որ իրենց դիմած 45 անձանց խորհրդատվություն է տրվել և իրավական աջակցություն ցուցաբերվել:

Սադիկյանը հայտնեց, որ երբ զինակոչիկների առողջության հետ կապված խնդիրներով դիմում են պաշտպանության նախարարությանը, նույնաբովանդակ պատասխաններ են ստանում, այսինքն` նշում են, որ զինակոչիկը պիտանի է ծառայությանը` այդ կերպ անտարբեր և ոչ պրոֆեսիոնալ վերաբերմունք ցուցաբերելով: